ഇന്ത്യയിൽ ഡീസൽ പൂഴ്ത്തിവെക്കലും കരിഞ്ചന്തയും തടയാൻ കേന്ദ്ര സർക്കാർ നിയന്ത്രണം ഏർപ്പെടുത്തി. കേന്ദ്ര പെട്രോളിയം, പ്രകൃതി വാതക മന്ത്രാലയത്തിന്റെ പുതിയ ഉത്തരവ് പ്രകാരം, രാജ്യത്തെ റീട്ടെയിൽ ഇന്ധന പമ്പുകളിൽ നിന്ന് ഒരു ഉപഭോക്താവിനോ വാഹനത്തിനോ പ്രതിദിനം പരമാവധി 200 ലിറ്റർ ഡീസൽ മാത്രമേ വാങ്ങാനാകൂ. ഉത്തരവ് ഉടൻ പ്രാബല്യത്തിൽ വന്നതായും ഇത് പരമാവധി 90 ദിവസത്തേക്ക് തുടരുമെന്നും അധികൃതർ അറിയിച്ചു.
വാണിജ്യ, വ്യാവസായിക, സ്ഥാപന ആവശ്യങ്ങൾക്കായി വലിയ തോതിൽ ഡീസൽ ഉപയോഗിക്കുന്നവർ കുറഞ്ഞ വിലയുള്ള റീട്ടെയിൽ പമ്പുകളെ ആശ്രയിക്കുന്ന പ്രവണത വർധിച്ചതിന്റെ പശ്ചാത്തലത്തിലാണ് നടപടി. ഇത്തരക്കാർ ഇനി റീട്ടെയിൽ പമ്പുകളിൽ നിന്ന് ഇന്ധനം ശേഖരിക്കുന്നതിന് പകരം, അവർക്കായി ഒരുക്കിയിട്ടുള്ള പ്രത്യേക ബൾക്ക് വിതരണ സംവിധാനങ്ങളിലൂടെയാണ് ഡീസൽ വാങ്ങേണ്ടത്.
ഡീസൽ പൂഴ്ത്തിവെക്കൽ, അനധികൃത സംഭരണം, കരിഞ്ചന്ത, ഇന്ധനത്തിന്റെ വഴിതിരിച്ചുവിടൽ എന്നിവ തടയുക എന്നതാണ് നിയന്ത്രണത്തിന്റെ പ്രധാന ലക്ഷ്യമെന്ന് കേന്ദ്ര സർക്കാർ വ്യക്തമാക്കി.
അതേസമയം, പശ്ചിമേഷ്യയിലെ സംഘർഷങ്ങളും വിതരണ ശൃംഖലയിലെ തടസ്സങ്ങളും നിലനിൽക്കുന്നുണ്ടെങ്കിലും രാജ്യത്ത് ആവശ്യത്തിന് ഡീസൽ ശേഖരമുണ്ടെന്നും ആശങ്കപ്പെടേണ്ട സാഹചര്യമില്ലെന്നും സർക്കാർ അറിയിച്ചു. സാധാരണ സ്വകാര്യ വാഹന ഉപയോക്താക്കൾ, കർഷകർ, പൊതുജനങ്ങൾക്ക് ആവശ്യമായ അവശ്യസേവനങ്ങൾ എന്നിവയെ പുതിയ നിയന്ത്രണം ബാധിക്കില്ലെന്നും അധികൃതർ വിശദീകരിച്ചു. പ്രതിദിനം 200 ലിറ്റർ എന്ന പരിധി സാധാരണ ഉപഭോക്താക്കളുടെ ആവശ്യത്തെക്കാൾ വളരെ കൂടുതലായതിനാൽ പൊതുജനങ്ങൾക്ക് ബുദ്ധിമുട്ടുണ്ടാകില്ലെന്നാണ് വിലയിരുത്തൽ.
