തമിഴ്നാട് നിയമസഭയുടെ 2026 തെരഞ്ഞെടുപ്പിന് ശേഷമുള്ള ആദ്യ സമ്മേളനത്തിൽ ഡിഎംകെ നേതാവും മുൻ മന്ത്രിയുമായ ഉദയനിധി സ്റ്റാലിൻ നടത്തിയ “സനാതന ധർമ്മം ഇല്ലാതാക്കണം” എന്ന പരാമർശം വലിയ രാഷ്ട്രീയ വിവാദത്തിന് വഴിവെച്ചു. സനാതന ധർമ്മം സമൂഹത്തിൽ വിഭജനവും ജാതിവ്യവസ്ഥയും ശക്തിപ്പെടുത്തുന്ന ആശയമാണെന്ന വിമർശനമാണ് അദ്ദേഹം സഭയിൽ ഉന്നയിച്ചത്.

മെയ് 10 ന് നടന്ന മുഖ്യമന്ത്രി സി. ജോസഫ് വിജയിന്റെ സത്യപ്രതിജ്ഞാ ചടങ്ങുമായി ബന്ധപ്പെട്ട പ്രോട്ടോക്കോൾ വിവാദത്തെക്കുറിച്ചും ഉദയനിധി തന്റെ പ്രസംഗത്തിനിടെ പരാമർശിച്ചു. വന്ദേമാതരം ആലപിച്ചതിന് ശേഷം തമിഴ് ഗാനം ആലപിച്ചു. തമിഴ് സംസ്കാരത്തിനും സംസ്ഥാന സ്വത്വത്തിനും കൂടുതൽ പ്രാധാന്യം നൽകണമെന്ന് അദ്ദേഹം വാദിച്ചു.

ഈ പരാമർശം 2023-ൽ ഉദയനിധി നടത്തിയ സമാന പ്രസ്താവനകളെ വീണ്ടും ദേശീയ തലത്തിൽ ചർച്ചയാക്കി. അന്ന് നടത്തിയ പരാമർശങ്ങൾക്കെതിരെ നിരവധി ഹർജികളും കേസുകളും ഉയർന്നിരുന്നു. ചില കോടതികൾ പ്രസ്താവനയെ “ വിദ്വേഷ പ്രസംഗം” ആയി വിശേഷിപ്പിച്ചതും രാഷ്ട്രീയ വിവാദങ്ങൾക്ക് ഇടയാക്കിയിരുന്നു.

ഉദയനിധിയുടെ പുതിയ പരാമർശത്തിനെതിരെ ബിജെപി നേതാക്കൾ ശക്തമായി രംഗത്തെത്തി. ഹിന്ദു വിശ്വാസങ്ങളെ അവഹേളിക്കുന്ന പ്രസ്താവനയാണിതെന്നും ജനങ്ങളുടെ മതവിശ്വാസത്തെ വ്രണപ്പെടുത്തുന്നതാണെന്നും ബിജെപി ആരോപിച്ചു. അതേസമയം, ഡിഎംകെ അനുകൂലികൾ ഇത് ജാതിവിവേചനത്തിനെതിരായ രാഷ്ട്രീയ നിലപാടാണെന്നാണ് പ്രതികരിച്ചത്.

നിയമസഭയിൽ പ്രസംഗം നടന്നപ്പോൾ സാന്നിധ്യത്തിലുണ്ടായിരുന്ന മുഖ്യമന്ത്രി വിജയ് വിഷയത്തിൽ പ്രതികരിക്കാതിരുന്നത് ശ്രദ്ധേയമായി. ഡിഎംകെയെ പരാജയപ്പെടുത്തി 108 സീറ്റുകൾ നേടി അധികാരത്തിലെത്തിയ ടിവികെ സർക്കാരിന്റെ നിലപാട് എന്താണെന്ന കാര്യത്തിൽ ഇതോടെ രാഷ്ട്രീയ വൃത്തങ്ങളിൽ ചർച്ചകൾ ശക്തമായി.