കൊല്ലം: കുണ്ടറ ഞാലിയോട് അമ്പിപോയ്ക ക്ഷേത്രത്തിലെ ഉത്സവത്തിനിടയിൽ വടിവാൾ വീശി യുവാവിന്റെ ആക്രമണം. സംഭവത്തിൽ മൂന്ന് പേർക്ക് പരിക്കേറ്റു.
കുണ്ടറ സ്വദേശി അജോയ് അശോകൻ ആണ് മാരകായുധവുമായി ക്ഷേത്ര പരിസരത്ത് ആക്രമണം നടത്തിയതെന്ന് പൊലീസ് അറിയിച്ചു. ആക്രമണത്തിൽ ഗുരുതരമായി പരിക്കേറ്റ മൂന്ന് പേരെ സമീപത്തെ ആശുപത്രിയിൽ പ്രവേശിപ്പിച്ചു.
സംഭവത്തിന് പിന്നിലെ കാരണം നാട്ടുകാർ പറയുന്നതനുസരിച്ച്, അജോയുടെ സഹോദരൻ രണ്ട് മാസം മുമ്പ് വാഹനാപകടത്തിൽ മരിച്ചിരുന്നു. ഇതിനെ തുടർന്ന് തന്റെ വീടിനടുത്തുള്ള ക്ഷേത്രത്തിൽ ഉത്സവം നടത്തരുതെന്ന് അജോയ് ക്ഷേത്ര ഭരണസമിതിയോട് ആവശ്യപ്പെട്ടിരുന്നു. എന്നാൽ ഈ ആവശ്യം പരിഗണിക്കാതെ ഉത്സവം നടത്തിയത് പ്രകോപനമായതോടെ ഇയാൾ വടിവാളുമായി എത്തി ആക്രമണം നടത്തുകയായിരുന്നുവെന്നാണ് സൂചന.
സംഭവത്തിന് ശേഷം ഒളിവിൽ പോയ അജോയ് അശോകനെതിരെ കുണ്ടറ പൊലീസ് കേസ് രജിസ്റ്റർ ചെയ്ത് അന്വേഷണം ആരംഭിച്ചു. പ്രദേശത്ത് പൊലീസ് സുരക്ഷ ശക്തമാക്കിയിട്ടുണ്ട്.
