വാഷിങ്ടൺ: അമേരിക്കൻ ഇടക്കാല തിരഞ്ഞെടുപ്പിൽ കനത്ത തിരിച്ചടി നേരിട്ടതിന് പിന്നാലെ തന്റെ കുടിയേറ്റ നയം അമിതമായി കടുത്തുപോയെന്ന് സമ്മതിച്ച് പ്രസിഡന്റ് ഡൊണാൾഡ് ട്രംപ്. വരും വർഷങ്ങളിൽ ഡെമോക്രാറ്റിക് പാർട്ടിയുമായി സഹകരിച്ച് പ്രവർത്തിക്കാൻ തയ്യാറാണെന്നും അദ്ദേഹം വ്യക്തമാക്കി.

നവംബർ മൂന്നിന് നടന്ന ഇടക്കാല തിരഞ്ഞെടുപ്പിൽ ജനപ്രതിനിധി സഭയിലും സെനറ്റിലും ഡെമോക്രാറ്റുകൾ ഭൂരിപക്ഷം നേടിയിരുന്നു. റിപ്പബ്ലിക്കൻ പാർട്ടിയുടെ നിയന്ത്രണത്തിലായിരുന്ന നിരവധി സീറ്റുകൾ പിടിച്ചെടുത്താണ് ഡെമോക്രാറ്റുകൾ നിർണായക വിജയം നേടിയത്. ട്രംപ് ഭരണകൂടത്തിന്റെ നയങ്ങൾക്കെതിരായ ജനവികാരമാണ് തിരഞ്ഞെടുപ്പ് ഫലത്തിൽ പ്രതിഫലിച്ചതെന്നാണ് വിലയിരുത്തൽ.

കുടിയേറ്റ നയം, സമ്പദ്‌വ്യവസ്ഥയുടെ കൈകാര്യം, ഇറാൻ യുദ്ധം, ജീവിതച്ചെലവിലുണ്ടായ വർധന തുടങ്ങിയ വിഷയങ്ങളിൽ വോട്ടർമാർക്കിടയിലുണ്ടായ അതൃപ്തിയാണ് റിപ്പബ്ലിക്കൻ പാർട്ടിക്ക് തിരിച്ചടിയായത്.

അമേരിക്കൻ ഭരണകൂടത്തിന്റെ നാടുകടത്തൽ നയങ്ങളെക്കുറിച്ചുള്ള ചോദ്യത്തിന് മറുപടിയായാണ് ട്രംപ് തന്റെ നിലപാട് വ്യക്തമാക്കിയത്. ”അത് വളരെ കടുത്തതായിരുന്നുവെന്നാണ് ഞാൻ കരുതുന്നത്. ഒരുപക്ഷേ അമിതമായി കടുത്തുപോയിരിക്കാം” എന്നായിരുന്നു സിബിഎസിന്റെ ’60 മിനിറ്റ്സ്’ പരിപാടിയിൽ ട്രംപിന്റെ പ്രതികരണം. വെള്ളിയാഴ്ച റെക്കോർഡ് ചെയ്ത അഭിമുഖം ഞായറാഴ്ച വൈകുന്നേരമാണ് സംപ്രേഷണം ചെയ്തത്.

എന്നാൽ, കുടിയേറ്റ വിരുദ്ധ നിലപാടുകൾക്ക് പേരുകേട്ട സ്റ്റീഫൻ മില്ലറെ അഭിമുഖം റെക്കോർഡ് ചെയ്തതിന് പിന്നാലെ ചീഫ് ഓഫ് സ്റ്റാഫായി ട്രംപ് നിയമിച്ചത് പുതിയ രാഷ്ട്രീയ ചർച്ചകൾക്ക് വഴിവെച്ചിട്ടുണ്ട്. കുടിയേറ്റ നയത്തിൽ ട്രംപ് യഥാർഥത്തിൽ മയപ്പെടുത്തൽ കൊണ്ടുവരുമോ എന്ന കാര്യത്തിൽ ഇതോടെ സംശയങ്ങളും ഉയരുന്നു.

ട്രംപ് ഭരണകൂടത്തിന്റെ കടുത്ത കുടിയേറ്റ നിയന്ത്രണങ്ങൾ ഏറ്റവും കൂടുതൽ ബാധിച്ച വിഭാഗങ്ങളിലൊന്ന് അമേരിക്കയിൽ ജോലി ചെയ്യുന്ന ഇന്ത്യൻ സാങ്കേതികവിദഗ്ധരായിരുന്നു. വിസാ നിയന്ത്രണങ്ങളും കുടിയേറ്റ നയങ്ങളിലെ കർശന നടപടികളും ഇന്ത്യൻ ഐടി പ്രൊഫഷണലുകൾ ഉൾപ്പെടെയുള്ള വിദേശ തൊഴിലാളികൾക്ക് വലിയ വെല്ലുവിളികളാണ് സൃഷ്ടിച്ചത്.

തിരഞ്ഞെടുപ്പിലെ കനത്ത തിരിച്ചടിക്കുശേഷം കുടിയേറ്റ നയത്തിൽ ട്രംപ് നടത്തുന്ന ഈ തുറന്നുപറച്ചിൽ അമേരിക്കൻ രാഷ്ട്രീയത്തിൽ നിർണായക ചർച്ചകൾക്ക് വഴിയൊരുക്കുമെന്നാണ് വിലയിരുത്തൽ.