തിരുവനന്തപുരം: വിമാനാപകടങ്ങളും അടിയന്തര അഗ്നിബാധാ സാഹചര്യങ്ങളും നേരിടുന്നതിനുള്ള ശേഷി വർധിപ്പിച്ച് കേരളത്തിലെ ആദ്യത്തെ അത്യാധുനിക റോസൻബൗർ പാന്തർ (Rosenbauer Panther) ക്രാഷ് ഫയർ ടെൻഡർ തിരുവനന്തപുരം അന്താരാഷ്ട്ര വിമാനത്താവളത്തിന്റെ അഗ്നിശമന വിഭാഗത്തിന്റെ ഭാഗമായി. ലോകോത്തര നിലവാരത്തിലുള്ള വിമാന രക്ഷാപ്രവർത്തനവും അഗ്നിശമന സേനയും(ARFF) മാനദണ്ഡങ്ങൾ പാലിക്കുന്ന ഈ വാഹനം വിമാനത്താവള സുരക്ഷയിൽ പുതിയ അധ്യായത്തിന് തുടക്കമിടുമെന്നാണ് അധികൃതർ വ്യക്തമാക്കുന്നത്.

വിമാനാപകടങ്ങൾ ഉൾപ്പെടെയുള്ള അടിയന്തര സാഹചര്യങ്ങളിൽ വേഗത്തിൽ ഇടപെടാൻ സഹായിക്കുന്ന ഹൈ റീച്ച് എക്സ്റ്റെൻഡബിൾ ടററ്റ് സംവിധാനമാണ് വാഹനത്തിന്റെ പ്രധാന സവിശേഷത. 16.5 മീറ്റർ വരെ ഉയരത്തിൽ എത്തുന്ന ഈ ടററ്റിന് വിമാനത്തിന്റെ ഫ്യൂസലാജ് തുളച്ചുകയറി നേരിട്ട് തീപിടിത്ത മേഖലകളിലേക്ക് വെള്ളവും നുരയും എത്തിക്കാൻ കഴിയും.

മിനിറ്റിൽ 6,000 ലിറ്റർ വരെ വെള്ളം പമ്പ് ചെയ്യാൻ ശേഷിയുള്ള വാഹനത്തിന് 90 മീറ്റർ ദൂരം വരെ വെള്ളവും ഫോമും പ്രയോഗിക്കാനാകും. വെറും 30 സെക്കൻഡിനുള്ളിൽ മണിക്കൂറിൽ 80 കിലോമീറ്റർ വേഗത കൈവരിക്കുന്നതിനാൽ അപകടസ്ഥലത്ത് അതിവേഗം എത്തിച്ചേരാനും സാധിക്കും.

തെർമൽ ഇമേജിങ് ക്യാമറകൾ, എല്ലാ ഭൂപ്രദേശങ്ങളിലും സഞ്ചരിക്കാനുള്ള ഓൾ-ടെറൈൻ ശേഷി, അത്യാധുനിക നിയന്ത്രണ സംവിധാനങ്ങൾ എന്നിവയും വാഹനത്തിൽ സജ്ജീകരിച്ചിട്ടുണ്ട്. അപകടസാഹചര്യങ്ങളിൽ കൃത്യമായ നിരീക്ഷണവും ദ്രുതഗതിയിലുള്ള രക്ഷാപ്രവർത്തനവും ഉറപ്പാക്കാൻ ഈ സാങ്കേതികവിദ്യകൾ സഹായിക്കും.

പുതിയ റോസൻബൗർ പാന്തറിന്റെ സേവനപ്രവേശനത്തോടെ തിരുവനന്തപുരം അന്താരാഷ്ട്ര വിമാനത്താവളത്തിലെ അഗ്നിശമന-രക്ഷാപ്രവർത്തന സംവിധാനങ്ങൾ കൂടുതൽ ശക്തിപ്പെടുകയും യാത്രക്കാരുടെ സുരക്ഷ ഉറപ്പാക്കുന്നതിൽ നിർണായക മുന്നേറ്റമാവുകയും ചെയ്യുമെന്ന് വിമാനത്താവള അധികൃതർ അറിയിച്ചു.