തിരുവനന്തപുരം: കേരള തീരത്ത് ഏർപ്പെടുത്തിയിരുന്ന 52 ദിവസത്തെ വാർഷിക ട്രോളിങ് നിരോധനം ഇന്ന് (വെള്ളി) അർധരാത്രിയോടെ അവസാനിക്കും. ശനി പുലർച്ചെ മുതൽ യന്ത്രവത്കൃത മത്സ്യബന്ധന ബോട്ടുകൾക്ക് വീണ്ടും കടലിൽ മത്സ്യബന്ധനത്തിന് ഇറങ്ങാനാകും. സമുദ്രത്തിലെ മത്സ്യസമ്പത്ത് സംരക്ഷിക്കുന്നതിനും മത്സ്യങ്ങളുടെ പ്രജനനകാലത്തിന് അനുകൂല സാഹചര്യം ഒരുക്കുന്നതിനുമായാണ് ജൂൺ 9 മുതൽ ട്രോളിങ് നിരോധനം ഏർപ്പെടുത്തിയിരുന്നത്.

ട്രോളിങ് നിരോധനം അവസാനിക്കുന്നതോടെ സംസ്ഥാനത്തെ മത്സ്യബന്ധന മേഖലയാകെ പുതിയ സീസണിന്റെ തിരക്കിലായി. തിരുവനന്തപുരം, കൊല്ലം, കൊച്ചി, കോഴിക്കോട് എന്നിവിടങ്ങളിലെ മത്സ്യബന്ധന തുറമുഖങ്ങളിൽ മത്സ്യത്തൊഴിലാളികളും ബോട്ടുടമകളും അവസാനഘട്ട ഒരുക്കങ്ങൾ പൂർത്തിയാക്കുകയാണ്. നാട്ടിലേക്ക് മടങ്ങിയിരുന്ന നിരവധി മത്സ്യത്തൊഴിലാളികൾ ഇതിനോടകം തന്നെ വിവിധ ഹാർബറുകളിൽ തിരിച്ചെത്തിയിട്ടുണ്ട്.

മത്സ്യബന്ധന ബോട്ടുകളിൽ ഇന്ധനം നിറയ്ക്കുന്നതിനൊപ്പം കടലിൽ ദിവസങ്ങളോളം തുടരാനുള്ള ഭക്ഷണം, കുടിവെള്ളം, ഐസ്, മറ്റ് അവശ്യസാധനങ്ങൾ എന്നിവയും ശേഖരിച്ചുവരികയാണ്. പുതിയ മത്സ്യബന്ധന സീസണിൽ മികച്ച വരുമാനം ലഭിക്കുമെന്ന പ്രതീക്ഷയിലാണ് മത്സ്യബന്ധന മേഖല.

ട്രോളിങ് നിരോധന കാലയളവിൽ പരമ്പരാഗത മത്സ്യത്തൊഴിലാളികൾക്ക് മികച്ച മത്സ്യലഭ്യത ഉണ്ടായത് ഈ സീസണിലും പ്രതീക്ഷ വർധിപ്പിക്കുന്ന ഘടകമായി വിലയിരുത്തപ്പെടുന്നു. ഇതോടെ നിരോധനം അവസാനിക്കുന്നതോടെ കടലിൽ സമൃദ്ധമായ മത്സ്യലഭ്യത ഉണ്ടാകുമെന്ന പ്രതീക്ഷയിലാണ് തൊഴിലാളികളും ബോട്ടുടമകളും.