ഹരിപ്പാട്: ജന്മനാടായ ഹരിപ്പാട്ടെ പ്രശസ്ത സുബ്രഹ്മണ്യസ്വാമി ക്ഷേത്രത്തിൽ വർഷംതോറും നടക്കുന്ന നിറപുത്തരി ആഘോഷ ചടങ്ങിൽ പങ്കെടുത്ത അനുഭവം പങ്കുവെച്ച് ഗാനരചയിതാവും കവിയുമായ ശ്രീകുമാരൻ തമ്പി. കയ്യിൽ നെൽക്കതിരുകളേന്തിയുള്ള ചടങ്ങിന്റെ ചിത്രങ്ങൾക്കൊപ്പമാണ് അദ്ദേഹം സമൂഹമാധ്യമത്തിൽ കുറിപ്പ് പങ്കുവെച്ചത്.
കേരളത്തിന്റെ കാർഷികോത്സവത്തിന്റെ ഭാഗമായും സാംസ്കാരിക പൈതൃകത്തിന്റെ അടയാളമായുമാണ് നിറപുത്തരി ചടങ്ങ് നടക്കുന്നതെന്ന് ശ്രീകുമാരൻ തമ്പി കുറിച്ചു. വിളവെടുപ്പുമായി ബന്ധപ്പെട്ട ആചാരങ്ങളുടെയും കാർഷിക സംസ്കാരത്തിന്റെയും പ്രതീകമാണ് ചടങ്ങ്.
ഹരിപ്പാട് സുബ്രഹ്മണ്യസ്വാമി ക്ഷേത്രത്തിലെ നിറപുത്തരി ചടങ്ങിന് സവിശേഷതയുണ്ടെന്നും അദ്ദേഹം ചൂണ്ടിക്കാട്ടി. ക്ഷേത്രത്തിൽ പൂജിച്ച നെൽക്കതിരുകൾ ആഘോഷപൂർവം സമീപത്തെ സബ് ട്രഷറിയിലേക്ക് കൊണ്ടുപോയി ട്രഷറി ഭണ്ഡാരം നിറയ്ക്കുന്ന ചടങ്ങ് നടത്തുന്ന കേരളത്തിലെ ഏക ക്ഷേത്രമാണ് ഹരിപ്പാട് സുബ്രഹ്മണ്യസ്വാമി ക്ഷേത്രമെന്നാണ് ശ്രീകുമാരൻ തമ്പിയുടെ കുറിപ്പിൽ പറയുന്നത്.
ക്ഷേത്രത്തിലെ സുബ്രഹ്മണ്യസ്വാമിയുടെ വ്യത്യസ്ത ഭാവങ്ങളെ അനുസ്മരിച്ചുകൊണ്ട് സ്വന്തം വരികളും അദ്ദേഹം കുറിപ്പിനൊപ്പം പങ്കുവെച്ചു:
> “ഉദയത്തിലൊരു രൂപം
മധ്യാഹ്നമൊരു രൂപം
സായന്തനത്തിൽ വേറൊരു രൂപം
ഹരിഗീത പുരവാസാ ശ്രീമുരുകാ നിൻ-
തിരു വിഗ്രഹം കണ്ടു മതി മറന്നേൻ..”
കാർഷിക പാരമ്പര്യവും ക്ഷേത്രാചാരവും സാംസ്കാരിക ഓർമകളും ഒരുമിക്കുന്ന നിറപുത്തരി ആഘോഷത്തിൽ പങ്കെടുത്തതിന്റെ സന്തോഷമാണ് ശ്രീകുമാരൻ തമ്പിയുടെ കുറിപ്പിലൂടെ വ്യക്തമാകുന്നത്.
