മാവേലിക്കര തപാൽ ഡിവിഷൻ നിർത്തലാക്കാനുള്ള തപാൽ വകുപ്പിന്റെ നീക്കത്തിനെതിരെ പ്രതിഷേധം ശക്തമാകുന്നു. പോസ്റ്റൽ ജോയിന്റ് ആക്ഷൻ കൗൺസിലിന്റെ നേതൃത്വത്തിൽ മാവേലിക്കര ഹെഡ് പോസ്റ്റ് ഓഫീസിന് മുന്നിൽ സംഘടിപ്പിച്ച തപാൽ ജീവനക്കാരുടെ പ്രതിഷേധ ധർണ കൊടിക്കുന്നിൽ സുരേഷ് എംപി ഉദ്ഘാടനം ചെയ്തു.
മാവേലിക്കര തപാൽ ഡിവിഷൻ നിർത്തലാക്കാനുള്ള നീക്കം പ്രദേശത്തെ തപാൽ സേവനങ്ങളെ പ്രതികൂലമായി ബാധിക്കുമെന്ന് ചൂണ്ടിക്കാട്ടിയാണ് ജീവനക്കാരും സംഘടനകളും പ്രതിഷേധവുമായി രംഗത്തെത്തിയത്.
ധർണ ഉദ്ഘാടനം ചെയ്തുകൊണ്ട് സംസാരിച്ച കൊടിക്കുന്നിൽ സുരേഷ് എംപി, തപാൽ ഡിവിഷൻ നിലനിർത്തുന്നതിനായി ആവശ്യമായ ഇടപെടലുകൾ നടത്തുമെന്നും ജീവനക്കാരുടെ പ്രതിഷേധത്തിന് പിന്തുണ നൽകുമെന്നും വ്യക്തമാക്കി.
തപാൽ ഡിവിഷൻ നിർത്തലാക്കാനുള്ള നീക്കത്തിൽ നിന്ന് തപാൽ വകുപ്പ് പിന്മാറണമെന്ന ആവശ്യം പ്രതിഷേധത്തിൽ ഉയർന്നു.
