You are currently viewing ആലപ്പുഴയിൽ പക്ഷിപ്പനി സ്ഥിരീകരിച്ചു; 26,000 വളർത്തുപക്ഷികളെ കൊന്നൊടുക്കുന്നു

ആലപ്പുഴയിൽ പക്ഷിപ്പനി സ്ഥിരീകരിച്ചു; 26,000 വളർത്തുപക്ഷികളെ കൊന്നൊടുക്കുന്നു

ആലപ്പുഴ: ജില്ലയിൽ പക്ഷിപ്പനി (ഏവിയൻ ഇൻഫ്ലുവൻസ) സ്ഥിരീകരിച്ചതിനെ തുടർന്ന് ഏകദേശം 26,000 വളർത്തുപക്ഷികളെ ഇന്ന് കൊന്നൊടുക്കുന്നു. രോഗം സ്ഥിരീകരിച്ച കേന്ദ്രങ്ങളുടെ ഒരു കിലോമീറ്റർ ചുറ്റളവിലുള്ള പ്രദേശങ്ങളിലാണ് പ്രതിരോധ നടപടികളുടെ ഭാഗമായി പക്ഷികളെ കൊന്നൊടുക്കുന്നത്. മൂന്ന് ഗ്രാമപഞ്ചായത്തുകളിലായി മൃഗസംരക്ഷണ, ആരോഗ്യ വകുപ്പുകളുടെ സംയുക്ത മേൽനോട്ടത്തിലാണ് നടപടി പുരോഗമിക്കുന്നത്.

ആലപ്പുഴ ജില്ലയിലെ രണ്ട് ഫാമുകളിലെ കാട, താറാവ്, കോഴി എന്നിവയിൽ പക്ഷിപ്പനി സ്ഥിരീകരിച്ചിട്ടുണ്ട്. ഭോപ്പാലിലെ നാഷണൽ ഇൻസ്റ്റിറ്റ്യൂട്ട് ഓഫ് ഹൈ സെക്യൂരിറ്റി അനിമൽ ഡിസീസസിൽ നടത്തിയ പരിശോധനയിലാണ് സാമ്പിളുകളിൽ വൈറസ് സാന്നിധ്യം കണ്ടെത്തിയത്.

രോഗവ്യാപനം തടയുന്നതിനായി ആറ് ദ്രുതകർമ സേനകളെ (റാപ്പിഡ് റെസ്‌പോൺസ് ടീമുകൾ) വിന്യസിച്ചിട്ടുണ്ട്. അടിയന്തര സാഹചര്യം നേരിടുന്നതിനായി രണ്ട് സംഘങ്ങളെ കൂടി കരുതൽ സേനയായി നിലനിർത്തിയിട്ടുണ്ട്.

രോഗം സ്ഥിരീകരിച്ച ഫാമുകൾക്ക് ചുറ്റുമുള്ള 10 കിലോമീറ്റർ പരിധി നിരീക്ഷണ മേഖലയായി പ്രഖ്യാപിച്ചു. ഈ പ്രദേശങ്ങളിൽ രോഗലക്ഷണങ്ങൾ കണ്ടെത്തുന്നതിനും രോഗവ്യാപനം നിയന്ത്രിക്കുന്നതിനുമുള്ള നിരീക്ഷണവും പ്രതിരോധ പ്രവർത്തനങ്ങളും ശക്തമാക്കിയിട്ടുണ്ട്.

പക്ഷിപ്പനി കൂടുതൽ പ്രദേശങ്ങളിലേക്ക് വ്യാപിക്കാതിരിക്കാനുള്ള മുൻകരുതൽ നടപടികളുടെ ഭാഗമായാണ് വിപുലമായ പ്രതിരോധ പ്രവർത്തനങ്ങൾ നടത്തുന്നത്.

Leave a Reply