കൊല്ലം: ദീർഘനാളായി കൊല്ലം കല്ലുംതാഴം ജംഗ്ഷനിലും പരിസര പ്രദേശങ്ങളിലും അനുഭവപ്പെട്ടിരുന്ന രൂക്ഷമായ ഗതാഗതക്കുരുക്കിന് ആശ്വാസമായി കല്ലുംതാഴം റെയിൽവേ മേൽപ്പാലത്തിന്റെ ഇരുവരിപ്പാത ഗതാഗതത്തിനായി തുറന്നു.
ഇതോടെ കല്ലുംതാഴം മുതൽ കാവനാട് വരെയുള്ള ഭാഗത്ത് ഗതാഗതം കൂടുതൽ സുഗമമാകും. പാലത്തിലൂടെയുള്ള ഇരുവശ ഗതാഗതം സാധ്യമായതോടെ ജംഗ്ഷനിലും സമീപ റോഡുകളിലും അനുഭവപ്പെടുന്ന ഗതാഗതത്തിരക്ക് കുറയ്ക്കാൻ സാധിക്കുമെന്നാണ് പ്രതീക്ഷ.
വരാനിരിക്കുന്ന ഓണക്കാലത്തെ തിരക്ക് കൂടി കണക്കിലെടുക്കുമ്പോൾ റെയിൽവേ മേൽപ്പാലത്തിന്റെ ഇരുവരിപ്പാത തുറന്നത് യാത്രക്കാർക്ക് ഏറെ പ്രയോജനകരമാകും. മാസങ്ങളായി യാത്രക്കാർ നേരിട്ടുവന്ന ഗതാഗതക്കുരുക്കിനും യാത്രാക്ലേശത്തിനും ഇതോടെ വലിയൊരളവിൽ പരിഹാരമാകുമെന്നാണ് വിലയിരുത്തൽ.
