വാണിജ്യ തിമിംഗല വേട്ട നിരോധിക്കാൻ ബിൽ അവതരിപ്പിക്കുമെന്ന് ഐസ്‌ലൻഡ് സർക്കാർ പ്രഖ്യാപിച്ചു. ഇത് യാഥാർഥ്യമായാൽ, ലോകത്ത് വാണിജ്യ തിമിംഗല വേട്ട തുടരുന്ന രാജ്യങ്ങളിൽ നോർവേയും ജപ്പാനും മാത്രമായി ചുരുങ്ങും.

രണ്ടുവർഷത്തെ ഇടവേളയ്ക്കുശേഷം 2026 ജൂണിൽ ഐസ്‌ലൻഡ് തിമിംഗല വേട്ട പുനരാരംഭിച്ചിരുന്നു. അന്താരാഷ്ട്ര പ്രകൃതി സംരക്ഷണ യൂണിയൻ (ഐയുസിഎൻ) ‘വൾനറബിൾ’ വിഭാഗത്തിൽ ഉൾപ്പെടുത്തിയിട്ടുള്ള ജീവിവർഗമാണ് ഫിൻ തിമിംഗലം.

1986-ൽ പ്രാബല്യത്തിൽ വന്ന ആഗോള തിമിംഗല വേട്ട നിരോധനത്തിനെതിരെ വിയോജിപ്പ് രേഖപ്പെടുത്തി 2006 മുതൽ ഐസ്‌ലൻഡ് വാണിജ്യ വേട്ട തുടരുകയായിരുന്നു. ക്രിസ്ത്യൻ ലോഫ്റ്റ്‌സണിന്റെ നേതൃത്വത്തിലുള്ള ഹ്വാലുർ എച്ച്എഫ് എന്ന ഒരു കമ്പനി മാത്രമാണ് ഈ വേട്ട നടത്തിവരുന്നത്. പ്രതിഷേധങ്ങളും മൃഗക്ഷേമ വിഷയങ്ങളും സാമ്പത്തിക ഘടകങ്ങളും കാരണം വേട്ട പലതവണ തടസപ്പെട്ടിരുന്നു; 2024ലും 2025ലും സാധുവായ അനുമതി ഉണ്ടായിരുന്നിട്ടും ഒരു തിമിംഗലത്തെയും വേട്ടയാടിയിരുന്നില്ല.

ജപ്പാനിലേക്കുള്ള കയറ്റുമതി ആവശ്യകത കുറഞ്ഞതും, ആഭ്യന്തരമായി വർധിച്ചുവരുന്ന എതിർപ്പും, മൃഗക്ഷേമ ആശങ്കകളും യൂറോപ്യൻ യൂണിയൻ അംഗത്വ ചർച്ചകളുമായുള്ള പൊരുത്തപ്പെടലും ഈ തീരുമാനത്തിന് പിന്നിലെ പ്രധാന കാരണങ്ങളാണ്. ഇയു ചട്ടങ്ങൾ വാണിജ്യ തിമിംഗല വേട്ട അനുവദിക്കുന്നില്ല. ഇയു ചർച്ചകൾ പുനരാരംഭിക്കുന്നത് സംബന്ധിച്ച് ഓഗസ്റ്റ് അവസാനം ഐസ്‌ലൻഡിൽ ഹിതപരിശോധന നടന്നിരുന്നു.

ഹ്യൂമൻ വേൾഡ് ഫോർ അനിമൽസ് ഉൾപ്പെടെയുള്ള മൃഗക്ഷേമ-പരിസ്ഥിതി സംഘടനകൾ പ്രഖ്യാപനത്തെ സ്വാഗതം ചെയ്തു. അതേസമയം, സാംസ്കാരികവും ശാസ്ത്രീയവും സാമ്പത്തികവുമായ കാരണങ്ങൾ ചൂണ്ടിക്കാട്ടി വേട്ട തുടരണമെന്ന നിലപാടിലാണ് ഏക വാണിജ്യ ഓപ്പറേറ്ററായ ഹ്വാലുർ എച്ച്എഫ്.

ബിൽ പാസായാൽ, ഏകദേശം രണ്ട് പതിറ്റാണ്ടു നീണ്ട വാണിജ്യ തിമിംഗല വേട്ടയ്ക്ക് ഐസ്‌ലൻഡിൽ അന്ത്യം കുറിക്കുന്ന നിർണായക നയംമാറ്റമായി ഇത് വിലയിരുത്തപ്പെടും.