ന്യൂഡൽഹി: ഇന്ത്യക്കാരെ അപകീർത്തിപ്പെടുത്താൻ പ്രധാനമന്ത്രി നരേന്ദ്ര മോദി അമേരിക്കൻ പിന്തുണ തേടുന്നുവെന്ന ആരോപണം ചോദ്യം ചെയ്ത ഇന്ത്യൻ ആക്ടിവിസ്റ്റ് അഭിജീത് ദിപ്കെയ്ക്ക് മറുപടിയുമായി അമേരിക്കൻ ഗായിക മേരി മിൽബൻ. മോദിക്ക് ഇന്ത്യയിലെ ജനങ്ങളുടെ ശക്തമായ പിന്തുണയുണ്ടെന്നും അമേരിക്കൻ പിന്തുണ അദ്ദേഹത്തിന് ആവശ്യമില്ലെന്നും അവർ വ്യക്തമാക്കി.

അമേരിക്കൻ പ്രസിഡന്റുമാർക്കായി ദേശീയഗാനങ്ങൾ ആലപിച്ചിട്ടുള്ള അന്താരാഷ്ട്ര പ്രശസ്തയായ ഗായികയാണ് മേരി മിൽബൻ. മോദിയെ പിന്തുണച്ച് രംഗത്തെത്താറുള്ള അവർ, ദിപ്കെയുടെ അമേരിക്കൻ വിദ്യാഭ്യാസവും കഴിവുകളും ഇന്ത്യയുടെ പുരോഗതിക്കായി പ്രയോജനപ്പെടുത്തണമെന്ന് ആവശ്യപ്പെട്ടു.

പ്രധാനമന്ത്രിയുമായി കൂടിക്കാഴ്ച നടത്തി ക്രിയാത്മകമായി ഇടപെടുകയാണ് വേണ്ടതെന്നും നിയമവിരുദ്ധമായ പ്രവർത്തനങ്ങളിലൂടെ ലക്ഷ്യങ്ങൾ നേടാൻ ശ്രമിക്കരുതെന്നും മിൽബൻ ദിപ്കെയോട് നിർദേശിച്ചു. മോദിയെ എതിർക്കുന്ന അമേരിക്കൻ സാമ്പത്തിക സഹായദാതാക്കൾ ദിപ്കെയുടെ പ്രസ്ഥാനത്തിന് പിന്തുണ നൽകുന്നുണ്ടെന്നും പ്രസ്ഥാനം വിജയിച്ചില്ലെങ്കിൽ അവർ കൈവിടുമെന്നും മിൽബൻ ആരോപിച്ചു.

പന്ത്രണ്ടു വർഷത്തെ ഭരണകാലത്തും തുടർച്ചയായ മൂന്ന് തിരഞ്ഞെടുപ്പ് വിജയങ്ങളിലും മോദിക്ക് ഇന്ത്യയിലെ ജനങ്ങളുടെ പിന്തുണ ലഭിച്ചിട്ടുണ്ടെന്ന് മിൽബൻ ചൂണ്ടിക്കാട്ടി. 2029-ലെ പൊതുതിരഞ്ഞെടുപ്പിലും മോദി വിജയിക്കുമെന്ന് അവർ പ്രവചിച്ചു.

ഇന്ത്യയുടെ ആഭ്യന്തര രാഷ്ട്രീയത്തിൽ വിദേശ ഇടപെടൽ ഉണ്ടാകുന്നുവെന്ന ആരോപണങ്ങളും യുവജന പ്രക്ഷോഭങ്ങളെച്ചൊല്ലിയുള്ള തർക്കങ്ങളും ശക്തമാകുന്നതിനിടെയാണ് മിൽബന്റെ പ്രതികരണം ശ്രദ്ധ നേടുന്നത്. സമൂഹമാധ്യമത്തിൽ വലിയ പ്രതികരണങ്ങൾക്കിടയാക്കിയ ഈ പോസ്റ്റ്, വിദേശ സാമ്പത്തിക സഹായം, രാഷ്ട്രീയ പ്രക്ഷോഭങ്ങൾ, ജനാധിപത്യ ഇടപെടൽ എന്നിവയെക്കുറിച്ചുള്ള ചർച്ചകൾക്ക് വീണ്ടും വഴിതുറന്നു.