കൊച്ചി: എറണാകുളം വൈപ്പിൻ എളങ്കുന്നപ്പുഴയിലെ പെട്രോൾ പമ്പിൽ ഗുണ്ടാസംഘത്തിന്റെ ആക്രമണം തടയാനെത്തിയ രണ്ട് പൊലീസ് ഉദ്യോഗസ്ഥർക്ക് കുത്തേറ്റു. ഞാറക്കൽ പൊലീസ് സ്റ്റേഷനിലെ പ്രിൻസിപ്പൽ എസ്‌ഐ ജിതിൻ, സിവിൽ പൊലീസ് ഓഫീസർ രാകേഷ് എന്നിവർക്കാണ് പരിക്കേറ്റത്. ഇരുവരെയും ആശുപത്രിയിൽ പ്രവേശിപ്പിച്ചു.
എളങ്കുന്നപ്പുഴയിലെ പെട്രോൾ പമ്പിൽ സ്വകാര്യ ബസ് ജീവനക്കാരെ ഒരു സംഘം മർദിക്കുന്നത് തടയാനെത്തിയപ്പോഴാണ് പൊലീസ് ഉദ്യോഗസ്ഥർക്ക് നേരെ ആക്രമണമുണ്ടായത്. കൊലക്കേസ് പ്രതിയായ ‘മുന്ന’ എന്ന പ്രജിത്തും സംഘവുമാണ് ആക്രമണം നടത്തിയതെന്നാണ് വിവരം.
സംഭവവുമായി ബന്ധപ്പെട്ട് മുഖ്യപ്രതി പ്രജിത്ത്, സഹോദരൻ പ്രജീഷ്, വരാപ്പുഴ സ്വദേശി രാഹുൽ എന്നിവരെ പൊലീസ് കസ്റ്റഡിയിലെടുത്തു. സംഭവത്തിൽ കൂടുതൽ അന്വേഷണം നടത്തിവരികയാണ്.
പൊലീസ് ഉദ്യോഗസ്ഥർക്കു നേരെ കുത്തേറ്റ സംഭവം പ്രദേശത്ത് ആശങ്ക സൃഷ്ടിച്ചിട്ടുണ്ട്. സ്വകാര്യ ബസ് ജീവനക്കാരെ മർദിച്ചതിനു പിന്നിലെ സാഹചര്യങ്ങളും ആക്രമണത്തിന്റെ മറ്റ് വിശദാംശങ്ങളും പൊലീസ് പരിശോധിച്ചുവരികയാണ്.
