തിരുവനന്തപുരം: ശ്രീകാര്യത്ത് അതിക്രൂരമായി കൊല്ലപ്പെട്ട പതിനേഴുകാരനായ അഭിറാമിന്റെ മൃതദേഹം കഴക്കൂട്ടം ശാന്തിതീരം പൊതുശ്മശാനത്തിൽ സംസ്കരിച്ചു. കാര്യവട്ടം പാങ്ങപ്പാറ സംഗീത നഗറിലെ വീട്ടിൽ രാവിലെ പൊതുദർശനത്തിന് വെച്ച മൃതദേഹത്തിൽ അന്തിമോപചാരം അർപ്പിക്കാൻ ബന്ധുക്കളും സുഹൃത്തുക്കളും നാട്ടുകാരുമടക്കം വൻ ജനാവലിയാണ് എത്തിയത്. വിദേശത്തായിരുന്ന മാതാവും സഹോദരിയും എത്തിയ ശേഷമാണ് സംസ്കാര ചടങ്ങുകൾ നടന്നത്.
പ്രണയപ്പകയുടെ പേരിൽ സുഹൃത്തിനെ വിളിച്ചുവരുത്താൻ വിസമ്മതിച്ചതാണ് പ്ലസ് ടു വിദ്യാർഥിയായ അഭിറാമിന്റെ കൊലപാതകത്തിന് പിന്നിലെന്നാണ് പോലീസിന്റെ കണ്ടെത്തൽ. സുഹൃത്തിനെ എത്തിച്ചുനൽകാൻ വിസമ്മതിച്ചതിലുള്ള വൈരാഗ്യമാണ് കൊലപാതകത്തിലേക്ക് നയിച്ചതെന്നാണ് അന്വേഷണത്തിൽ വ്യക്തമായത്.
ഇൻസ്റ്റഗ്രാം വഴി വ്യാജ സന്ദേശം അയച്ചാണ് പ്രതികൾ അഭിറാമിനെ ആളൊഴിഞ്ഞ പറമ്പിലേക്ക് വിളിച്ചുവരുത്തിയത്. തുടർന്ന് അതിക്രൂരമായി ആക്രമിച്ച് കൊലപ്പെടുത്തുകയായിരുന്നു.
സംഭവവുമായി ബന്ധപ്പെട്ട് പ്രായപൂർത്തിയാകാത്ത മുഖ്യപ്രതി, കാപ്പാ കേസ് പ്രതിയായ ഉമ്മർ മുഫ്താർ, അനന്ത എന്ന പെൺകുട്ടി എന്നിവരെ പോലീസ് അറസ്റ്റ് ചെയ്തിട്ടുണ്ട്. കേസിൽ കൂടുതൽ വിവരങ്ങൾ പുറത്തുകൊണ്ടുവരുന്നതിനായി അന്വേഷണം തുടരുകയാണ്.
യുവാവിന്റെ ദാരുണമായ കൊലപാതകം നാടിനെ ഒന്നടങ്കം കണ്ണീരിലാഴ്ത്തിയിരിക്കുകയാണ്. അഭിറാമിന് അന്ത്യാഞ്ജലി അർപ്പിക്കാൻ എത്തിയവരുടെ കണ്ണീരോടെയാണ് സംസ്കാര ചടങ്ങുകൾ പൂർത്തിയായത്.
