പൃഥ്വിരാജ് സുകുമാരൻ നായകനാകുന്ന ബിഗ് ബജറ്റ് ആക്ഷൻ ത്രില്ലർ **‘ഖലീഫ’**യുടെ അഡ്വാൻസ് ബുക്കിങ് ആരംഭിച്ചു. ചിത്രം ഓഗസ്റ്റ് 20ന് ലോകമെമ്പാടുമുള്ള തിയറ്ററുകളിൽ റിലീസ് ചെയ്യാനിരിക്കെയാണ് ബുക്കിങ് തുറന്നത്. ഓണം ആഘോഷങ്ങൾക്ക് ദിവസങ്ങൾ മാത്രം ശേഷിക്കെയാണ് ചിത്രത്തിന്റെ റിലീസ്.

വൈശാഖ് സംവിധാനം ചെയ്യുന്ന ‘ഖലീഫ’ രണ്ട് ഭാഗങ്ങളിലായി ഒരുങ്ങുന്ന കഥയുടെ ആദ്യ ഭാഗമാണ്. സ്വർണക്കടത്ത് സംഘവുമായി ബന്ധപ്പെട്ട അമീർ അലി എന്ന കഥാപാത്രത്തെയാണ് പൃഥ്വിരാജ് അവതരിപ്പിക്കുന്നത്. മോഹൻലാൽ ചിത്രത്തിൽ പൃഥ്വിരാജിന്റെ കഥാപാത്രത്തിന്റെ മുത്തച്ഛനായി പ്രധാന വേഷത്തിലെത്തുന്നു.

‘Vengeance Will Be Written in Gold’ എന്ന ടാഗ്‌ലൈനോടെയാണ് ചിത്രത്തിന്റെ പ്രചാരണം. തോക്കുമായി ഇരിക്കുന്ന പൃഥ്വിരാജിന്റെ പുതിയ പോസ്റ്ററും അണിയറപ്രവർത്തകർ പുറത്തുവിട്ടിട്ടുണ്ട്.

അഡ്വാൻസ് ബുക്കിങ് ആരംഭിച്ചതിന് പിന്നാലെ ചിത്രത്തിന്റെ ട്രെയിലറിനായുള്ള കാത്തിരിപ്പും ശക്തമായിരിക്കുകയാണ്. തിയറ്റർ റിലീസിന് മുന്നോടിയായി കൂടുതൽ പ്രമോഷൻ പ്രവർത്തനങ്ങളുമായി ‘ഖലീഫ’ എത്തുമെന്നാണ് പ്രതീക്ഷിക്കുന്നത്.