ഗുവാഹത്തി: അസമിലെ പ്രളയസാഹചര്യം പല മേഖലകളിലും വെള്ളം ഇറങ്ങിത്തുടങ്ങിയതോടെ മെച്ചപ്പെട്ടുവരുന്നുണ്ടെങ്കിലും അപ്പർ അസമിലെ നിരവധി പ്രദേശങ്ങൾ ഇപ്പോഴും കടുത്ത ദുരിതത്തിലാണ്. ജൂലൈ 29-ലെ ഏറ്റവും പുതിയ കണക്കുകൾ പ്രകാരം പ്രളയത്തിൽ മരിച്ചവരുടെ എണ്ണം 75 ആയി ഉയർന്നു. ജൂലൈ 28-ന് ശിവസാഗർ ജില്ലയിൽ മാത്രം മുങ്ങിമരിച്ച ഏഴ് പേരുടെ മരണമാണ് മരണസംഖ്യ ഉയരാൻ കാരണം.

സംസ്ഥാനത്തെ ഏഴ് ജില്ലകളിലായി ഏകദേശം 3.32 ലക്ഷം ആളുകളെയാണ് പ്രളയം ബാധിച്ചിരിക്കുന്നത്. ശിവസാഗർ, ചരൈദിയോ, ഗോലാഘട്ട്, ജോർഹട്ട്, നാഗാവ്, സോണിത്പൂർ, കാംറൂപ് മെട്രോപൊളിറ്റൻ ജില്ലകളിലെ 21 റവന്യൂ സർക്കിളുകളിലായി 622 ഗ്രാമങ്ങൾ ഇപ്പോഴും പ്രളയക്കെടുതിയിലാണ്.

പ്രളയബാധിതരുടെ എണ്ണത്തിൽ ചരൈദിയോ ജില്ല ഏറ്റവും മുന്നിലാണ്. ഇവിടെ ഏകദേശം 1.43 ലക്ഷം പേർ ദുരിതമനുഭവിക്കുന്നതായി റിപ്പോർട്ടുണ്ട്. ശിവസാഗറിൽ ഏകദേശം 97,000 പേരും, ജോർഹട്ടിൽ 57,000-ത്തിലധികം പേരും പ്രളയബാധിതരാണ്.

സംസ്ഥാനത്തെ മിക്ക നദികളിലെയും ജലനിരപ്പ് അപകടനിലയ്ക്ക് താഴെയെത്തിയെങ്കിലും ഗോലാഘട്ട് ജില്ലയിലെ നുമാലിഗഡിൽ ധൻസിരി (സൗത്ത്) നദി ഇപ്പോഴും അപകടനിലയ്ക്ക് മുകളിലൂടെ ഒഴുകുകയാണ്. ഇതുമൂലം സമീപപ്രദേശങ്ങളിൽ ജാഗ്രത തുടരുകയാണ്.

പ്രളയത്തിൽ പതിനായിരക്കണക്കിന് ഹെക്ടർ കൃഷിയിടങ്ങൾ ഇപ്പോഴും വെള്ളത്തിനടിയിലാണ്. നിൽക്കുന്ന വിളകൾക്ക് വലിയ നാശനഷ്ടമുണ്ടായിട്ടുണ്ട്. 26,000-ത്തിലധികം കന്നുകാലികൾ ഒഴുക്കിൽപ്പെട്ടു, ലക്ഷക്കണക്കിന് വളർത്തുമൃഗങ്ങളെയും പ്രളയം ബാധിച്ചു. നൂറുകണക്കിന് വീടുകൾ പൂർണമായോ ഭാഗികമായോ തകർന്നതോടൊപ്പം റോഡുകൾ, പാലങ്ങൾ, കരിങ്കെട്ടുകൾ, സ്കൂളുകൾ എന്നിവയ്ക്കും കേടുപാടുകൾ സംഭവിച്ചു. വൈദ്യുതി വിതരണം തടസ്സപ്പെട്ട പ്രദേശങ്ങളിൽ പുനഃസ്ഥാപന പ്രവർത്തനങ്ങൾ പുരോഗമിക്കുകയാണ്.

സംസ്ഥാനത്തിന്റെ വിവിധ ഭാഗങ്ങളിൽ 80-ലധികം ദുരിതാശ്വാസ ക്യാമ്പുകൾ പ്രവർത്തിക്കുന്നുണ്ട്. പതിനായിരക്കണക്കിന് ആളുകൾ ഇവിടെ അഭയം തേടിയിരിക്കുകയാണ്. ദേശീയ ദുരന്തനിവാരണ സേന സംസ്ഥാന ദുരന്തനിവാരണ സേന സൈന്യം, സിവിൽ ഡിഫൻസ് വിഭാഗങ്ങൾ എന്നിവയുടെ നേതൃത്വത്തിൽ ബോട്ടുകൾ ഉപയോഗിച്ചുള്ള രക്ഷാപ്രവർത്തനവും തുടരുകയാണ്.

പ്രളയബാധിതർക്കായി മുഖ്യമന്ത്രി ഹിമന്ത ബിശ്വ ശർമ പ്രഖ്യാപിച്ച പ്രത്യേക ദുരിതാശ്വാസ പാക്കേജും നടപ്പാക്കിവരികയാണ്. മരിച്ചവരുടെ കുടുംബങ്ങൾക്ക് ലഭിക്കുന്ന ധനസഹായം 9 ലക്ഷം രൂപയായി വർധിപ്പിച്ചു. ഗുരുതരമായി ബാധിച്ച ഒരു ലക്ഷത്തിലധികം കുടുംബങ്ങൾക്ക് 15,000 രൂപയുടെ അടിയന്തര ധനസഹായവും നൽകും. ഓഗസ്റ്റ് 1 മുതൽ ഒരുനോദോയ് പദ്ധതിയുടെ ആനുകൂല്യം പുനരാരംഭിക്കുന്നതോടൊപ്പം ഏറ്റവും കൂടുതൽ ബാധിച്ച ജില്ലകളിലെ ഗുണഭോക്താക്കൾക്ക് 2,500 രൂപയുടെ പ്രത്യേക സഹായവും അനുവദിച്ചിട്ടുണ്ട്. വിദ്യാർത്ഥികൾക്കായി പുസ്തകസഹായം, സൗജന്യ പാഠപുസ്തകങ്ങൾ, യൂണിഫോമുകൾ, നഷ്ടപ്പെട്ട വിദ്യാഭ്യാസ രേഖകൾ സൗജന്യമായി പുനഃസ്ഥാപിക്കുന്നതടക്കമുള്ള നടപടികളും പ്രഖ്യാപിച്ചിട്ടുണ്ട്.

പ്രളയനാശനഷ്ടങ്ങൾ വിലയിരുത്താൻ കേന്ദ്രസർക്കാർ സംഘം സംസ്ഥാനത്ത് സന്ദർശനം നടത്തിയിട്ടുണ്ട്. നിലവിൽ രോഗവ്യാപനം തടയുന്നതിനുള്ള അണുനശീകരണം, വൈദ്യുതി പുനഃസ്ഥാപിക്കൽ, പുനരധിവാസം, അടിസ്ഥാന സൗകര്യങ്ങളുടെ നവീകരണം എന്നിവയ്ക്കാണ് സർക്കാർ പ്രധാന പരിഗണന നൽകുന്നത്.