കോഴിക്കോട്: വടകരയ്ക്ക് സമീപം കുഞ്ഞിപ്പള്ളി ദേശീയപാതയിൽ കാർ ഡിവൈഡറിലിടിച്ച് മറിഞ്ഞ് തീപിടിച്ചുണ്ടായ അപകടത്തിൽ യാത്രക്കാർ അത്ഭുതകരമായി രക്ഷപ്പെട്ടു. കർണാടകയിൽ നിന്നുള്ള ആറുപേരാണ് കാറിലുണ്ടായിരുന്നത്. ഗുരുവായൂരിലേക്ക് തീർത്ഥാടനത്തിനായി പോകുകയായിരുന്നു ഇവർ.
ഡ്രൈവർ ഉറങ്ങിപ്പോയതാണ് അപകടത്തിന് കാരണമെന്നാണ് പ്രാഥമിക നിഗമനം. നിയന്ത്രണം വിട്ട കാർ ദേശീയപാതയിലെ ഡിവൈഡറിലിടിച്ച് മറിയുകയായിരുന്നു. പിന്നാലെ വാഹനത്തിന് തീപിടിച്ചു. അപകടത്തിന്റെ ആഘാതത്തിലും തീപിടിത്തത്തിനിടയിലും യാത്രക്കാർക്ക് വാഹനത്തിൽനിന്ന് പുറത്തുകടക്കാൻ കഴിഞ്ഞതിനാൽ വൻ ദുരന്തം ഒഴിവായി. ആർക്കും ജീവഹാനിയുണ്ടായില്ല.
വിവരമറിഞ്ഞ് വടകരയിൽ നിന്നും മാഹിയിൽ നിന്നുമുള്ള അഗ്നിരക്ഷാസേനാ യൂണിറ്റുകൾ സ്ഥലത്തെത്തി തീയണച്ചു. എന്നാൽ തീ പടർന്നതോടെ കാർ പൂർണമായും കത്തിനശിച്ചു.
ഡ്രൈവർ ഉറങ്ങിപ്പോയതാണോ അപകടത്തിന് പിന്നിലെന്ന് അധികൃതർ പരിശോധിച്ചുവരികയാണ്.
