അമേരിക്കയിൽ രാജ്യവ്യാപകമായി ഏർപ്പെടുത്തിയിരുന്ന വിമാന സർവീസുകളുടെ നിയന്ത്രണം പിൻവലിച്ചതോടെ വിമാനങ്ങൾ വീണ്ടും സർവീസ് ആരംഭിച്ചു. നവംബർ 13 വെള്ളിയാഴ്ച നാല് മണിക്കൂറിലേറെ നീണ്ടുനിന്ന നിയന്ത്രണം ഇന്ത്യൻ സമയം നവംബർ 14 ശനിയാഴ്ച രാവിലെ 6.45-നാണ് ഫെഡറൽ ഏവിയേഷൻ അഡ്മിനിസ്ട്രേഷൻ (എഫ്എഎ) പിൻവലിച്ചത്. അമേരിക്കൻ സമയം രാത്രി 8.15-നായിരുന്നു തീരുമാനം.

വിമാന ഗതാഗത നിയന്ത്രണ സംവിധാനത്തിലെ സാങ്കേതിക തകരാറാണ് പ്രതിസന്ധിക്ക് കാരണമായതെന്നാണ് അധികൃതർ വ്യക്തമാക്കിയത്. കാലപ്പഴക്കം ചെന്ന എയർ ട്രാഫിക് കൺട്രോൾ സ്വിച്ചുകളിലും റൂട്ടറുകളിലും അമിതമായി വിവരങ്ങൾ എത്തിയതോടെ അവയുടെ പ്രവർത്തനം താളം തെറ്റുകയായിരുന്നു. ഇതുമൂലം തെറ്റായതും പൊരുത്തപ്പെടാത്തതുമായ വിവരങ്ങൾ കൈമാറാൻ തുടങ്ങിയതോടെയാണ് വിമാനങ്ങളുടെ പുറപ്പെടൽ താൽക്കാലികമായി നിർത്തിവെക്കേണ്ടിവന്നതെന്ന് ഗതാഗത സെക്രട്ടറി സീൻ ഡഫി അറിയിച്ചു.

അതേസമയം, സംഭവത്തിന് പിന്നിൽ സൈബർ ആക്രമണമോ സുരക്ഷാ ഭീഷണിയോ ഇല്ലെന്ന് ആഭ്യന്തര സുരക്ഷാ സെക്രട്ടറി മാർക്ക്വെയ്ൻ മുള്ളൻ വ്യക്തമാക്കി. മൈക്രോസോഫ്റ്റിന്റെ മറ്റേതെങ്കിലും സാങ്കേതിക തകരാറുകളുമായി സംഭവത്തിന് ബന്ധമില്ലെന്നും അധികൃതർ അറിയിച്ചു. നിയന്ത്രണം നിലവിൽ വന്ന സമയത്ത് ആകാശത്തുണ്ടായിരുന്ന വിമാനങ്ങൾക്ക് സുരക്ഷിതമായി ലക്ഷ്യസ്ഥാനങ്ങളിൽ ഇറങ്ങാൻ അനുമതി നൽകിയിരുന്നു.

വിമാന സർവീസുകൾ പുനരാരംഭിച്ചെങ്കിലും പ്രതിസന്ധിയുടെ പ്രത്യാഘാതങ്ങൾ പൂർണമായി മാറിയിട്ടില്ല. പതിനായിരത്തിലേറെ വിമാന സർവീസുകളാണ് റദ്ദാക്കലും വൈകലും ഉൾപ്പെടെയുള്ള പ്രതിസന്ധികൾ നേരിട്ടത്. ഇതോടെ പതിനായിരക്കണക്കിന് യാത്രക്കാരെ പ്രതിസന്ധി ബാധിച്ചു. വിമാനങ്ങളും ജീവനക്കാരും വിവിധ വിമാനത്താവളങ്ങളിൽ പുനഃക്രമീകരിക്കേണ്ടതിനാൽ വാരാന്ത്യത്തിലും സർവീസുകൾ വൈകാൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകി.

ഡെൽറ്റ എയർലൈൻസ് ഉൾപ്പെടെയുള്ള പ്രമുഖ വിമാനക്കമ്പനികൾ പതിവ് സർവീസുകൾ പുനരാരംഭിച്ചിട്ടുണ്ട്. യാത്രക്കാർക്കായി ടിക്കറ്റ് മാറ്റുന്നതിനുള്ള പ്രത്യേക ഇളവുകളും ചില കമ്പനികൾ പ്രഖ്യാപിച്ചു. അമേരിക്കയിലേക്കും തിരിച്ചുമുള്ള സർവീസുകളെ ബാധിച്ച സാഹചര്യത്തിൽ എയർ ഇന്ത്യയും യാത്രക്കാർക്കായി പ്രത്യേക നിർദേശങ്ങൾ പുറപ്പെടുവിച്ചിട്ടുണ്ട്.

വിമാന ഗതാഗതം പുനഃസ്ഥാപിച്ചെങ്കിലും യാത്രയ്ക്ക് മുമ്പ് വിമാനക്കമ്പനികളിൽ നിന്ന് പുതുക്കിയ സമയവിവരങ്ങൾ ഉറപ്പാക്കണമെന്ന് അധികൃതർ യാത്രക്കാരോട് നിർദേശിച്ചു.