You are currently viewing ഇന്ത്യയിലെ ചീറ്റകളുടെ എണ്ണം 62 ആയി ഉയർന്നു; നാല് കുഞ്ഞുങ്ങൾക്ക് ജന്മം നൽകി ബോട്സ്വാനയിൽ നിന്നെത്തിയ ചീറ്റ

ഇന്ത്യയിലെ ചീറ്റകളുടെ എണ്ണം 62 ആയി ഉയർന്നു; നാല് കുഞ്ഞുങ്ങൾക്ക് ജന്മം നൽകി ബോട്സ്വാനയിൽ നിന്നെത്തിയ ചീറ്റ

ന്യൂഡൽഹി: ഇന്ത്യയിലെ ചീറ്റകളുടെ എണ്ണം 62 ആയി ഉയർന്നു. മധ്യപ്രദേശിലെ കുനോ ദേശീയോദ്യാനത്തിൽ ബോട്സ്വാനയിൽ നിന്ന് എത്തിച്ച 2.5 വയസ്സുള്ള പെൺചീറ്റയായ KOMG 3 നാല് കുഞ്ഞുങ്ങൾക്ക് ജന്മം നൽകിയതോടെയാണ് ചീറ്റകളുടെ എണ്ണം വർധിച്ചത്. കേന്ദ്ര പരിസ്ഥിതി മന്ത്രി ഭൂപേന്ദർ യാദവാണ് ഇക്കാര്യം അറിയിച്ചത്.

പ്രോജക്ട് ചീറ്റയുടെ സുപ്രധാന നാഴികക്കല്ലായാണ് ഈ നേട്ടത്തെ മന്ത്രി വിശേഷിപ്പിച്ചത്. ബോട്സ്വാനയിൽ നിന്ന് ഇന്ത്യയിലെത്തിച്ച ഒരു ചീറ്റ പദ്ധതിയുടെ ഭാഗമായി സ്വതന്ത്രമായി വനത്തിൽ കഴിയുന്നതിനിടെ കുഞ്ഞുങ്ങൾക്ക് ജന്മം നൽകുന്നത് ഇതാദ്യമാണ്.

നാല് മാസത്തിലേറെയായി കുനോ ദേശീയോദ്യാനത്തിലെ വനമേഖലയിൽ സ്വതന്ത്രമായി കഴിയുകയായിരുന്നു KOMG 3. ഈ കാലയളവിനിടെയാണ് നാല് ആരോഗ്യവാന്മാരായ കുഞ്ഞുങ്ങൾക്ക് ജന്മം നൽകിയത്.

2022-ൽ ഇന്ത്യയിൽ ചീറ്റകളെ പുനരവതരിപ്പിച്ച ശേഷം വനത്തിൽ രേഖപ്പെടുത്തുന്ന രണ്ടാമത്തെ പ്രസവമാണിത്. നിലവിലുള്ള 62 ചീറ്റകളിൽ 43 എണ്ണവും ഇന്ത്യയിൽ ജനിച്ചവയാണെന്നതും ശ്രദ്ധേയമാണ്.

1952-ലാണ് ഇന്ത്യയിൽ ചീറ്റകൾ വംശനാശം സംഭവിച്ചതായി ഔദ്യോഗികമായി പ്രഖ്യാപിച്ചത്. ദശാബ്ദങ്ങൾക്കുശേഷം രാജ്യത്ത് ചീറ്റകളെ പുനരവതരിപ്പിക്കുന്നതിനായി ആരംഭിച്ച പദ്ധതിയുടെ പുരോഗതിയാണ് പുതിയ ജനനത്തോടെ വീണ്ടും ശ്രദ്ധ നേടുന്നത്.

Leave a Reply