തിരുവനന്തപുരം: മുൻ കെ.എസ്.ആർ.ടി.സി താൽക്കാലിക ഡ്രൈവറായിരുന്ന എൽ.എച്ച്. യദുവിന് കേരള നിയമസഭയിൽ താൽക്കാലിക ബസ് ഡ്രൈവറായി നിയമനം ലഭിച്ചു. ദിവസവേതന അടിസ്ഥാനത്തിലുള്ള നിയമനമാണ് ലഭിച്ചിരിക്കുന്നത്. നിയമസഭാ സമ്മേളനം നടക്കുന്ന ദിവസങ്ങളിൽ എം.എൽ.എ ഹോസ്റ്റലിൽ നിന്ന് ജനപ്രതിനിധികളെ നിയമസഭയിലേക്ക് എത്തിക്കുന്ന ചുമതലയായിരിക്കും യദു നിർവഹിക്കുക.

പുതുപ്പള്ളി എം.എൽ.എ ചാണ്ടി ഉമ്മൻ നിയമസഭാ സ്പീക്കർ തിരുവഞ്ചൂർ രാധാകൃഷ്ണന് നൽകിയ ശുപാർശ കത്തിന്റെ അടിസ്ഥാനത്തിലാണ് നിയമനനടപടികൾ പൂർത്തിയായതെന്നാണ് ലഭിക്കുന്ന വിവരം.

2024 ഏപ്രിലിൽ തിരുവനന്തപുരം പാളയത്ത് നടന്ന സംഭവത്തെ തുടർന്നാണ് എൽ.എച്ച്. യദു സംസ്ഥാനതലത്തിൽ ശ്രദ്ധേയനായത്. അന്ന് മുൻ തിരുവനന്തപുരം മേയറായ ആര്യാ രാജേന്ദ്രനും ഭർത്താവും എം.എൽ.എയുമായ സച്ചിൻ ദേവും സഞ്ചരിച്ചിരുന്ന കാറും കെ.എസ്.ആർ.ടി.സി ബസും തമ്മിൽ റോഡിൽ വാക്കേറ്റമുണ്ടായിരുന്നു.

മേയറുടെ പരാതിപ്രകാരം, ബസിന് സൈഡ് നൽകാത്തതിനൊപ്പം ഡ്രൈവർ അശ്ലീല ആംഗ്യം കാണിച്ചുവെന്നായിരുന്നു ആരോപണം. എന്നാൽ, കാർ ബസിന് കുറുകെയിട്ട് ഡ്യൂട്ടി തടസ്സപ്പെടുത്തിയെന്നാണ് യദു നൽകിയ മറുപടി. തുടർന്ന് ഇരുഭാഗത്തിനുമെതിരെ പൊലീസ് കേസുകൾ രജിസ്റ്റർ ചെയ്തിരുന്നു.

ഈ വിവാദങ്ങൾക്ക് പിന്നാലെ യദുവിനെ കെ.എസ്.ആർ.ടി.സിയിലെ താൽക്കാലിക ജോലിയിൽ നിന്ന് ഒഴിവാക്കി. തുടർച്ചയായി ഫോണിൽ സംസാരിച്ചുകൊണ്ട് അപകടകരമായി ബസ് ഓടിച്ചതിനാലാണ് നടപടി സ്വീകരിച്ചതെന്ന് അന്നത്തെ ഗതാഗത മന്ത്രി കെ.ബി. ഗണേഷ് കുമാർ വ്യക്തമാക്കിയിരുന്നു. എന്നാൽ, വിവരാവകാശ നിയമപ്രകാരം ലഭിച്ച രേഖകൾ ചൂണ്ടിക്കാട്ടി ഈ ആരോപണം യദു നിഷേധിച്ചിരുന്നു.

ജോലി നഷ്ടപ്പെട്ടതിന് ശേഷം ഓൺലൈൻ ഡെലിവറി ജോലികളിലൂടെയാണ് യദു ഉപജീവനം കണ്ടെത്തിയത്. പിന്നീട് അദ്ദേഹം ഐ.എൻ.ടി.യു.സി സംഘടനയിൽ അംഗത്വവും സ്വീകരിച്ചു.