തിരുവനന്തപുരം: മന്ത്രിമാരുടെ ഔദ്യോഗിക വസതികളുടെ നവീകരണവുമായി ബന്ധപ്പെട്ട വിവാദത്തിൽ വിശദീകരണവുമായി പ്രതിപക്ഷ നേതാവ് പിണറായി വിജയൻ. മന്ത്രിമന്ദിരങ്ങളിലെ നവീകരണം വെറും സൗന്ദര്യവൽക്കരണത്തിനല്ലെന്നും പഴയ കെട്ടിടങ്ങളുടെ സുരക്ഷ ഉറപ്പാക്കുന്നതിനും ആവശ്യമായ അറ്റകുറ്റപ്പണികൾ നടത്തുന്നതിനുമാണെന്നും അദ്ദേഹം വ്യക്തമാക്കി.
മന്ത്രിമാർ താമസിക്കുന്ന പല ഔദ്യോഗിക വസതികളും നിലവിൽ ശോചനീയാവസ്ഥയിലാണെന്നും കെട്ടിടങ്ങളുടെ അവസ്ഥ പരിഗണിച്ച് ആവശ്യമായ അറ്റകുറ്റപ്പണികൾ നടത്തേണ്ടതുണ്ടെന്നും അദ്ദേഹം പറഞ്ഞു. നവീകരണ പ്രവർത്തനങ്ങളെ അനാവശ്യ ചെലവായി കാണേണ്ടതില്ലെന്നും കെട്ടിടങ്ങളുടെ സുരക്ഷയും താമസയോഗ്യതയും ഉറപ്പാക്കുകയാണ് ലക്ഷ്യമെന്നും അദ്ദേഹം വിശദീകരിച്ചു.
കന്റോൺമെന്റ് ഹൗസിന്റെ നിലവിലെ അവസ്ഥയും അദ്ദേഹം വിശദീകരിച്ചു. പ്രതിപക്ഷ നേതാവിന്റെ ഔദ്യോഗിക വസതിയായ കന്റോൺമെന്റ് ഹൗസിൽ ഇപ്പോൾ താമസിക്കാൻ കഴിയാത്ത അവസ്ഥയാണെന്നാണ് പിണറായി വിജയൻ പറഞ്ഞത്. അറ്റകുറ്റപ്പണികൾ പൂർത്തിയാകാൻ സമയമെടുക്കുന്നതിനാൽ ഇപ്പോഴും വാടകവീട്ടിലാണ് താമസിക്കുന്നതെന്നും അദ്ദേഹം വ്യക്തമാക്കി.
രണ്ടാഴ്ചയ്ക്കുള്ളിൽ കന്റോൺമെന്റ് ഹൗസിലേക്ക് മാറാമെന്ന പ്രതീക്ഷയിലായിരുന്നു വാടകവീട്ടിലേക്ക് മാറിയത്. എന്നാൽ കെട്ടിടത്തിന്റെ അറ്റകുറ്റപ്പണികൾ പൂർത്തിയാകാത്തതിനാൽ താമസം നീളുകയായിരുന്നു. മുൻ പ്രതിപക്ഷ നേതാവ് വി.ഡി. സതീശൻ എങ്ങനെയാണ് ആ അവസ്ഥയിൽ അവിടെ താമസിച്ചതെന്ന് അറിയില്ലെന്നും അദ്ദേഹം പ്രതികരിച്ചു. കന്റോൺമെന്റ് ഹൗസിലുണ്ടായ തീപിടിത്തവും അദ്ദേഹം പരാമർശിച്ചു. താൻ അവിടെ താമസം തുടങ്ങിയശേഷമായിരുന്നു തീപിടിത്തമുണ്ടായിരുന്നതെങ്കിൽ മാധ്യമങ്ങളിൽ പലതരത്തിലുള്ള വാർത്തകൾ വന്നേനെയെന്നും അദ്ദേഹം പറഞ്ഞു.
കെട്ടിടങ്ങളുടെ പഴക്കവും സുരക്ഷാ പ്രശ്നങ്ങളും കണക്കിലെടുത്ത് അറ്റകുറ്റപ്പണികൾ നടത്തേണ്ടത് അനിവാര്യമാണെന്നും പിണറായി വിജയൻ കൂട്ടിച്ചേർത്തു.
