ന്യൂഡൽഹി: ലഡാക്ക് ഇന്ത്യയുടെ അവിഭാജ്യവും വേർപെടുത്താനാവാത്തതുമായ ഭാഗമാണെന്നും ചൈനയുടെ നിഷേധാത്മക നിലപാടുകൾക്ക് ഈ യാഥാർഥ്യം മാറ്റാനാവില്ലെന്നും വിദേശകാര്യ മന്ത്രാലയം വ്യക്തമാക്കി. ലഡാക്കിലെ 28 സ്ഥലങ്ങൾക്കും ഭൂപ്രകൃതി സവിശേഷതകൾക്കും ഔദ്യോഗികമായി പേരുകൾ നിശ്ചയിച്ച ഇന്ത്യയുടെ നടപടിക്കെതിരെ ചൈന പ്രതിഷേധിച്ചതിനു പിന്നാലെയാണ് ഒക്ടോബർ 13ന് ഇന്ത്യയുടെ പ്രതികരണം.
ലഡാക്കിലെ വിവിധ സ്ഥലങ്ങൾക്കും ഭൂപ്രകൃതി സവിശേഷതകൾക്കും അംഗീകൃത പേരുകൾ നിശ്ചയിച്ചതായി ഒക്ടോബർ രണ്ടിന് കേന്ദ്ര ആഭ്യന്തര മന്ത്രാലയം പ്രഖ്യാപിച്ചിരുന്നു. ലഡാക്ക് ഭരണകൂടവുമായും പ്രാദേശിക പങ്കാളികളുമായും കൂടിയാലോചിച്ചാണ് നടപടി സ്വീകരിച്ചതെന്നും സർവേ ഓഫ് ഇന്ത്യ ഭൂപടത്തിൽ ഈ പേരുകൾ ഉൾപ്പെടുത്തുകയാണ് ലക്ഷ്യമെന്നും മന്ത്രാലയം വ്യക്തമാക്കിയിരുന്നു. സ്ഥലങ്ങളെ കൃത്യമായി തിരിച്ചറിയുന്നതിനും അവയെക്കുറിച്ചുള്ള പൊതുജനങ്ങളുടെ അവബോധം വർധിപ്പിക്കുന്നതിനുമാണ് ഈ നീക്കം.
പർവതങ്ങൾ, കൊടുമുടികൾ, ചുരങ്ങൾ, ഹിമാനികൾ, നദികൾ, തടാകങ്ങൾ, താഴ്‌വരകൾ, നീരുറവകൾ എന്നിവ ഉൾപ്പെടുന്നതാണ് പേരുകൾ നിശ്ചയിച്ച 28 സ്ഥലങ്ങൾ. അതീഷ ഗിരി, കനിഷ്ക കൊടുമുടി, സൊറാവർ കൊടുമുടി, രിഞ്ചൻ സാങ്പോ, ശിവ രി, മഹേശ്വര രി തുടങ്ങിയവ പട്ടികയിലുണ്ട്. ചാപ്ചിംഗൽ ചുരം, ശാച്മിർ പാസ്, പാർപിക്, സ്കാംരി ഹിമാനികൾ എന്നിവയും പട്ടികയിൽ ഉൾപ്പെടുന്നു.
