മലയാള സിനിമയിലെ ശ്രദ്ധേയ കൂട്ടുകെട്ടായ മമ്മൂട്ടിയും സംവിധായകൻ അടൂർ ഗോപാലകൃഷ്ണനും വീണ്ടും ഒന്നിക്കുന്നു. ഇരുവരും ഒന്നിക്കുന്ന പുതിയ ചിത്രം ‘പദയാത്ര’യുടെ ട്രെയിലർ സെപ്റ്റംബർ 12ന് രാത്രി 8.55ന് പുറത്തിറങ്ങും. മമ്മൂട്ടി തന്നെയാണ് ഔദ്യോഗിക അക്കൗണ്ടിലൂടെ ട്രെയിലർ ലോഞ്ച് സമയം അറിയിച്ചത്.
‘അനന്തരം’, ‘മതിലുകൾ’, ‘വീഥി’ എന്നീ ചിത്രങ്ങൾക്ക് ശേഷം മമ്മൂട്ടിയും അടൂർ ഗോപാലകൃഷ്ണനും ഒന്നിക്കുന്ന നാലാമത്തെ ചിത്രമാണിത്. മമ്മൂട്ടി കമ്പനിയുടെ ബാനറിൽ ചിത്രത്തിന്റെ ഷൂട്ടിങ് ഈ വർഷം ആദ്യം പൂർത്തിയാക്കിയിരുന്നു.
നഗരജീവിതം ഉപേക്ഷിച്ച് ആദിവാസി മേഖലയിലേക്ക് പോകുന്ന ഒരു ഡോക്ടറുടെ ജീവിതമാണ് ചിത്രത്തിന്റെ പ്രമേയം. യാത്ര, ആത്മപരിശോധന, ജീവിതത്തിലെ മാറ്റങ്ങൾ തുടങ്ങിയ ആശയങ്ങൾ സൂചിപ്പിക്കുന്ന തരത്തിലുള്ള പോസ്റ്ററുകൾ നേരത്തെ തന്നെ ശ്രദ്ധ നേടിയിരുന്നു.
ഇന്ദ്രൻസ്, ഗ്രേസ് ആന്റണി, ശ്രീഷ്മ ചന്ദ്രൻ, സീനത്ത് എ.പി. എന്നിവരും ചിത്രത്തിൽ പ്രധാന വേഷങ്ങളിലെത്തുന്നു. മമ്മൂട്ടിയും അടൂരും വീണ്ടും ഒന്നിക്കുന്നതിന്റെ ആവേശത്തിലാണ് ആരാധകർ. ഗൗരവമുള്ള പ്രമേയവും ശക്തമായ കഥാപാത്രങ്ങളുമുള്ള ഒരു ചിത്രമാണ് ‘പദയാത്ര’യിലൂടെ പ്രതീക്ഷിക്കപ്പെടുന്നത്. ചിത്രത്തിന്റെ തിയറ്റർ റിലീസ് സംബന്ധിച്ച ഔദ്യോഗിക പ്രഖ്യാപനം ട്രെയിലർ ലോഞ്ചിനോട് അനുബന്ധിച്ച് ഉണ്ടാകുമോയെന്ന ആകാംക്ഷയിലും സിനിമാപ്രേമികൾ.
