ലയണൽ മെസിയെയും അർജന്റീന ഫുട്ബോൾ ടീമിനെയും കേരളത്തിലെത്തിക്കുമെന്ന പ്രഖ്യാപനത്തിന്റെ മറവിൽ വൻ സാമ്പത്തിക തട്ടിപ്പും ജിഎസ്ടി വെട്ടിപ്പും നടന്നതായി മുഖ്യമന്ത്രി വി.ഡി. സതീശൻ. പദ്ധതിയുമായി ബന്ധപ്പെട്ട് മുൻ സർക്കാരിന്റെ കാലത്ത് ഗുരുതരമായ ക്രമക്കേടുകൾ ഉണ്ടായിട്ടുണ്ടെന്നും സംഭവത്തിൽ നിയമപരമായ നടപടികൾ സ്വീകരിക്കുമെന്നും മുഖ്യമന്ത്രി വാർത്താസമ്മേളനത്തിൽ വ്യക്തമാക്കി.

പദ്ധതിയുടെ കരാർ അനുവദിക്കുന്നതിൽ നിയമപരമായ നടപടിക്രമങ്ങളും മുൻഗണനാക്രമങ്ങളും പാലിച്ചില്ലെന്നാണ് പ്രധാന കണ്ടെത്തൽ. യാതൊരു നടപടിക്രമവും പാലിക്കാതെയാണ് കരാർ സ്പോൺസർക്ക് കൈമാറിയതെന്നും മുഖ്യമന്ത്രി ആരോപിച്ചു.

സ്പോൺസറായ റിപ്പോർട്ടർ ബ്രോഡ്കാസ്റ്റിങ് കമ്പനി അർജന്റീന ഫുട്ബോൾ അസോസിയേഷന് 126 കോടി രൂപ കൈമാറിയതായി അവകാശപ്പെട്ടിരുന്നു. എന്നാൽ ഈ ഇടപാടുമായി ബന്ധപ്പെട്ട സേവന നികുതിയായ 22.68 കോടി രൂപ അടച്ചിട്ടില്ലെന്ന് നികുതി വകുപ്പ് കണ്ടെത്തിയതായി മുഖ്യമന്ത്രി പറഞ്ഞു.

അതേസമയം, 126 കോടി രൂപ കൈമാറിയതിനോ അർജന്റീന ഫുട്ബോൾ അസോസിയേഷൻ തുക കൈപ്പറ്റിയതിനോ കൃത്യമായ രേഖകൾ ലഭ്യമല്ലെന്നും അദ്ദേഹം വ്യക്തമാക്കി. ഇതോടെ ഇടപാടിന്റെ സാമ്പത്തിക സുതാര്യത സംബന്ധിച്ചും ചോദ്യങ്ങൾ ഉയർന്നിട്ടുണ്ട്.

അന്വേഷണം വൈകിപ്പിക്കാനുള്ള ശ്രമങ്ങളും ഉണ്ടായതായി മുഖ്യമന്ത്രി ആരോപിച്ചു. മുൻ സർക്കാരിന്റെ കാലത്ത് നികുതി വകുപ്പ് അഞ്ച് തവണ സമൻസ് അയച്ചിട്ടും സ്പോൺസർമാർ ഹാജരാകാതെ സമയം നീട്ടിവാങ്ങിയെന്നും ഇതുവഴി അന്വേഷണം വൈകിയെന്നും അദ്ദേഹം പറഞ്ഞു.

കായിക വകുപ്പ് നടത്തിയ പ്രാഥമിക അന്വേഷണ റിപ്പോർട്ട് മുഖ്യമന്ത്രിക്ക് സമർപ്പിച്ചിട്ടുണ്ട്. വിദേശനാണ്യ വിനിമയ ചട്ടങ്ങളുടെ ലംഘനവും കള്ളപ്പണം വെളുപ്പിക്കലും നടന്നിട്ടുണ്ടോയെന്ന സംശയവും ഉയർന്ന സാഹചര്യത്തിൽ വിഷയത്തിൽ കൂടുതൽ വിശദമായ അന്വേഷണം നടത്താനാണ് സർക്കാർ നീക്കം.

വിജിലൻസ്, എൻഫോഴ്സ്മെന്റ് ഡയറക്ടറേറ്റ് തുടങ്ങിയ അന്വേഷണ ഏജൻസികളെ ഉൾപ്പെടുത്തി വിപുലമായ അന്വേഷണം നടത്തണമോയെന്ന കാര്യം മന്ത്രിസഭ ഉടൻ ചർച്ച ചെയ്യുമെന്നും മുഖ്യമന്ത്രി വ്യക്തമാക്കി.