കൊല്ലം: കൊല്ലക സിഎംഎസ് എൽപി സ്കൂളിൽ ഒരു കോടി രൂപ വിനിയോഗിച്ച് നിർമിച്ച പുതിയ കെട്ടിടത്തിന്റെ ഉദ്ഘാടനം വനം, കശുവണ്ടി, നൈപുണ്യ വികസന വകുപ്പ് മന്ത്രി ഷിബു ബേബി ജോൺ നിർവഹിച്ചു. 2025 ജൂലൈയിൽ ആരംഭിച്ച കെട്ടിടനിർമാണം ഒരു വർഷത്തിനകം പൂർത്തിയാക്കുകയായിരുന്നു.

കന്നേറ്റി ഇടവക ചർച്ച് കമ്മിറ്റി, പിടിഎ, അധ്യാപകർ, മുൻ അധ്യാപകർ, പൂർവ്വ വിദ്യാർഥികൾ തുടങ്ങിയവരുടെ കൂട്ടായ പരിശ്രമമാണ് കെട്ടിടനിർമാണം സമയബന്ധിതമായി പൂർത്തിയാക്കുന്നതിന് സഹായകമായത്. ഇവരുടെ കൂട്ടായ പ്രവർത്തനം അഭിനന്ദനാർഹമാണെന്ന് ചടങ്ങിൽ വിലയിരുത്തി.

സി.എസ്.ഐ മധ്യകേരള മഹായിടവക മാനേജ്മെന്റിന് കീഴിൽ 1890-ൽ സ്ഥാപിതമായ കൊല്ലക സിഎംഎസ് എൽപി സ്കൂളിന്റെ 136-ാം വാർഷികാഘോഷവും പുതിയ കെട്ടിടത്തിന്റെ ഉദ്ഘാടനത്തോടനുബന്ധിച്ച് നടന്നു.

മധ്യകേരള മഹായിടവക ബിഷപ്പ് റൈറ്റ്. റവ. ഡോ. മലയിൽ സാബു കോശി ചെറിയാൻ ചടങ്ങിൽ അധ്യക്ഷത വഹിച്ചു. ചവറ മുൻ എംഎൽഎ സുജിത്ത് വിജയൻപിള്ളയും ചടങ്ങിൽ പങ്കെടുത്തു.

റവ. കെ. വർഗീസ് മാത്യു, ഷംല നൗഷാദ്, സന്തോഷ് തുപ്പാശ്ശേരി, ആർ. അരുൺരാജ്, ഷമീർ പുതുക്കുളം, സുകന്യ വി., സുധീന അൻസർ, സലിം കൊച്ചറ്റയിൽ, സുനുമോൾ കെ., അനിത ടി.കെ., ലവകുമാർ എം., സജിത, അഡ്വ. ഇ. യൂസഫ് കുഞ്ഞ് തുടങ്ങിയവർ ചടങ്ങിൽ സംബന്ധിച്ചു.