യാത്ര പുറപ്പെടുന്നതിന് തൊട്ടുമുൻപ് പാസ്പോർട്ട് കാലാവധി കഴിഞ്ഞതായി കണ്ടെത്തിയ യാത്രക്കാരൻ, ദുബായ് വിമാനത്താവളത്തിൽ വെച്ച് വെറും എട്ട് മിനിറ്റിനുള്ളിൽ പാസ്പോർട്ട് പുതുക്കിയ സംഭവം ശ്രദ്ധേയമാകുന്നു. ദുബായ് ആസ്ഥാനമായി പ്രവർത്തിക്കുന്ന മാധ്യമപ്രവർത്തകൻ മരിയോ നൗഫൽ പങ്കുവച്ച വീഡിയോയാണ് ഇത് ശ്രദ്ധയിൽപ്പെടുത്തിയത്.ഭരണനിർവഹണ കാര്യക്ഷമതയുടെ ഉദാഹരണമായാണ് അദ്ദേഹം ഈ വീഡിയോ പങ്കുവച്ചത്.
പാസ്പോർട്ട് കാലാവധി കഴിഞ്ഞെന്നറിഞ്ഞപ്പോഴുള്ള യാത്രക്കാരന്റെ ആശ്ചര്യവും, മിനിറ്റുകൾക്കുള്ളിൽ പുതുക്കിയ പാസ്പോർട്ട് ലഭിച്ചപ്പോഴുള്ള ആശ്വാസവും സന്തോഷവും വീഡിയോയിൽ പകർത്തിയിട്ടുണ്ട്. വിമാനം നഷ്ടപ്പെടാതെ തന്നെ അദ്ദേഹത്തിന് യാത്ര തുടരാനായി.
ദുബായ് ഉൾപ്പെടെയുള്ള യു.എ.ഇ വിമാനത്താവളങ്ങളിൽ 24 മണിക്കൂറും പാസ്പോർട്ട് പുതുക്കൽ സേവനം ലഭ്യമാണെന്നാണ് വിവരം. പ്രത്യേക കേന്ദ്രങ്ങളിലൂടെയും ഡിജിറ്റൽ സംവിധാനങ്ങളിലൂടെയും സാധാരണയായി അഞ്ച് മുതൽ പത്ത് മിനിറ്റിനുള്ളിൽ ഈ പ്രക്രിയ പൂർത്തിയാക്കാനാകും. ബയോമെട്രിക്സും ഓട്ടോമേഷനും ഉപയോഗിച്ച് യാത്രാ തടസ്സങ്ങൾ കുറയ്ക്കാനുള്ള യു.എ.ഇയുടെ വിശാലമായ ശ്രമങ്ങളുടെ ഭാഗമാണ് ഈ വേഗതയേറിയ സേവനം.
മറ്റ് രാജ്യങ്ങളിൽ സാധാരണയായി ഏറെ സമയമെടുക്കുന്ന നടപടിക്രമങ്ങൾ യു.എ.ഇയിലെ സാങ്കേതികവിദ്യാധിഷ്ഠിത സർക്കാർ സേവനങ്ങൾ എത്രത്തോളം ലളിതമാക്കുന്നുവെന്നതിന്റെ ഉദാഹരണമായി ഈ വാർത്ത സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്.
