ന്യൂഡൽഹി: നീറ്റ്-യുജി 2026 ചോദ്യപേപ്പർ ചോർച്ച ആരോപണവുമായി ബന്ധപ്പെട്ട് സമരം നടത്തുന്ന വിദ്യാർഥികൾക്ക് പിന്തുണ പ്രഖ്യാപിച്ച് ഇന്ത്യാ ഗേറ്റിലേക്കും ഗാന്ധി സ്മൃതിയിലേക്കും പ്രതിഷേധ മാർച്ച് സംഘടിപ്പിക്കാൻ തീരുമാനിച്ചിരുന്ന പ്രതിപക്ഷ നേതാക്കളെ പൊലീസ് തടഞ്ഞതായി ലോക്സഭ പ്രതിപക്ഷ നേതാവ് രാഹുൽ ഗാന്ധി ആരോപിച്ചു.

വ്യാഴാഴ്ച സമൂഹമാധ്യമങ്ങളിൽ പങ്കുവെച്ച വീഡിയോ സന്ദേശത്തിലാണ് ബസിനുള്ളിൽ നിന്ന് സംസാരിച്ച രാഹുൽ ഗാന്ധി ഇക്കാര്യം വ്യക്തമാക്കിയത്. വിദ്യാർഥികളുടെ ആവശ്യങ്ങൾക്ക് ഐക്യദാർഢ്യം പ്രകടിപ്പിക്കാനാണ് പ്രതിഷേധ പരിപാടികൾ ആസൂത്രണം ചെയ്തതെന്നും, എന്നാൽ സുരക്ഷാ കാരണങ്ങൾ ചൂണ്ടിക്കാട്ടി അധികൃതർ പ്രതിഷേധത്തിന് അനുമതി നിഷേധിക്കുകയും യാത്ര തടയുകയും ചെയ്തുവെന്നും അദ്ദേഹം ആരോപിച്ചു.

നീറ്റ്-യുജി 2026 പരീക്ഷയുടെ ചോദ്യപേപ്പർ ചോർച്ച ആരോപണത്തെ തുടർന്ന് ഡൽഹിയിൽ വിദ്യാർഥികൾ ദിവസങ്ങളായി പ്രതിഷേധം തുടരുകയാണ്. വിദ്യാഭ്യാസ സംവിധാനത്തിലെ ക്രമക്കേടുകൾക്കെതിരെ ശക്തമായ നടപടി സ്വീകരിക്കണമെന്നും കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ രാജിവെക്കണമെന്നും ആവശ്യപ്പെട്ടാണ് സമരം.

ഇതിനുമുമ്പ് ജന്തർ മന്തറിലും മറ്റ് പ്രതിഷേധ കേന്ദ്രങ്ങളിലും നടന്ന സമരങ്ങൾക്കിടെ പൊലീസ് ലാത്തിച്ചാർജും പ്രതിപക്ഷ നേതാക്കളെ കസ്റ്റഡിയിലെടുക്കുകയും ചെയ്ത സംഭവങ്ങൾ ദേശീയതലത്തിൽ വിവാദമായിരുന്നു.

വിദ്യാർഥി സമരത്തിന് പിന്തുണ ശക്തമാക്കുന്നതിനും കേന്ദ്രസർക്കാരിന് മേൽ സമ്മർദം വർധിപ്പിക്കുന്നതിനുമായാണ് പ്രതിപക്ഷം പ്രതിഷേധങ്ങൾ വ്യാപിപ്പിക്കുന്നതെന്നാണ് രാഷ്ട്രീയ നിരീക്ഷകരുടെ വിലയിരുത്തൽ. അതേസമയം, പ്രതിഷേധങ്ങളുമായി ബന്ധപ്പെട്ട് സുരക്ഷാ ക്രമീകരണങ്ങൾ ശക്തമാക്കിയതായി ഡൽഹി പൊലീസ് അറിയിച്ചു.