പാലക്കാട് കഞ്ചിക്കോട് കോച്ച് ഫാക്ടറിക്കായി ഏറ്റെടുത്ത 238 ഏക്കർ സ്ഥലം 13 വർഷമായി ഉപയോഗശൂന്യമായി കിടക്കുന്ന സാഹചര്യത്തിൽ പുതിയ ഇടപെടലിന് സാധ്യത. കോച്ച് ഫാക്ടറി പ്രായോഗികമല്ലെങ്കിൽ, റെയിൽവേ ഉപകരണങ്ങൾ നിർമ്മിക്കുന്ന മറ്റ് അനുബന്ധ വ്യവസായ പദ്ധതികൾ ഇവിടെ ആരംഭിക്കണമെന്ന ആവശ്യം കേന്ദ്രസർക്കാർ പരിഗണിക്കുമെന്ന് കേന്ദ്ര റെയിൽവേ മന്ത്രി അശ്വിനി വൈഷ്ണവ് ഉറപ്പുനൽകിയതായി പാലക്കാട് എംപി വി.കെ. ശ്രീകണ്ഠൻ അറിയിച്ചു.
കഞ്ചിക്കോട് കോച്ച് ഫാക്ടറിക്കായി ഏറ്റെടുത്ത ഭൂമി വർഷങ്ങളായി ഉപയോഗിക്കാതെ കിടക്കുന്നത് പ്രദേശത്തിന്റെ വികസന സാധ്യതകളെ ബാധിക്കുന്ന വിഷയമാണെന്ന് എംപി ചൂണ്ടിക്കാട്ടി. നിലവിലെ സാഹചര്യത്തിൽ കോച്ച് ഫാക്ടറി പദ്ധതി നടപ്പാക്കുന്നത് പ്രായോഗികമല്ലെങ്കിൽ, റെയിൽവേയുമായി ബന്ധപ്പെട്ട മറ്റ് നിർമ്മാണ പദ്ധതികൾക്കായി ഭൂമി പ്രയോജനപ്പെടുത്തണമെന്നാണ് ആവശ്യം.
റെയിൽവേ ഉപകരണങ്ങളുടെ നിർമ്മാണം ഉൾപ്പെടെയുള്ള അനുബന്ധ പദ്ധതികൾ കഞ്ചിക്കോട് ആരംഭിക്കുന്നതിനുള്ള സാധ്യത പരിശോധിച്ച് ആവശ്യമായ നടപടികൾ സ്വീകരിക്കാമെന്ന് മന്ത്രി അശ്വിനി വൈഷ്ണവ് ഉറപ്പുനൽകിയതായി വി.കെ. ശ്രീകണ്ഠൻ വ്യക്തമാക്കി. ഇതിലൂടെ വർഷങ്ങളായി ഉപയോഗശൂന്യമായി കിടക്കുന്ന ഭൂമി റെയിൽവേയുടെ വികസന പ്രവർത്തനങ്ങൾക്ക് പ്രയോജനപ്പെടുത്തുന്നതിനും പാലക്കാടിന്റെ വ്യവസായ സാധ്യതകൾ വർധിപ്പിക്കുന്നതിനും വഴിയൊരുങ്ങുമെന്നാണ് പ്രതീക്ഷ.
