ഓണാവധിക്കാലത്ത് കർണാടകയിൽ നിന്ന് കേരളത്തിലേക്ക് മടങ്ങുന്ന മലയാളികളുടെ യാത്രാക്ലേശത്തിന് ആശ്വാസമായി കർണാടക സർക്കാർ 150 പ്രത്യേക ബസ് സർവീസുകൾ അനുവദിച്ചു. ആലപ്പുഴ എംപി കെ.സി. വേണുഗോപാലാണ് ഇക്കാര്യം അറിയിച്ചത്.
ട്രെയിനുകളിൽ ടിക്കറ്റ് ലഭിക്കാത്ത സാഹചര്യവും സ്വകാര്യ ബസുകൾ അമിത നിരക്ക് ഈടാക്കുന്നതും ചൂണ്ടിക്കാട്ടി കർണാടക ഗതാഗത മന്ത്രി ബി.എസ്. ബൈരതി സുരേഷിനോട് പ്രത്യേക സർവീസുകളുടെ എണ്ണം വർധിപ്പിക്കണമെന്ന് ആവശ്യപ്പെട്ടിരുന്നതായി കെ.സി. വേണുഗോപാൽ പറഞ്ഞു. തുടക്കത്തിൽ ബെംഗളൂരുവിൽ നിന്ന് പരിമിതമായ സർവീസുകളാണ് നിശ്ചയിച്ചിരുന്നത്. തുടർച്ചയായ ഇടപെടലുകളുടെ അടിസ്ഥാനത്തിലാണ് സർവീസുകളുടെ എണ്ണം 150 ആയി ഉയർത്തിയത്.
ഓഗസ്റ്റ് 21 മുതൽ 25 വരെയാണ് കർണാടകയിൽ നിന്ന് കേരളത്തിലേക്കുള്ള പ്രത്യേക സർവീസുകൾ ക്രമീകരിച്ചിരിക്കുന്നത്. കേരളത്തിൽ നിന്ന് കർണാടകയിലേക്കുള്ള മടക്ക സർവീസുകൾ ഓഗസ്റ്റ് 27 മുതൽ 30 വരെയും നടത്തും.
കോഴിക്കോട്, കോട്ടയം, പാലക്കാട്, തൃശ്ശൂർ, എറണാകുളം, ആലപ്പുഴ, കൊല്ലം, തിരുവനന്തപുരം, കാസർഗോഡ് ജില്ലകളിലേക്കാണ് പ്രത്യേക ബസ് സർവീസുകൾ ലഭ്യമാകുക. സർവീസുകളുടെ ഓൺലൈൻ ബുക്കിംഗ് ഉടൻ ആരംഭിക്കുമെന്ന് അധികൃതർ അറിയിച്ചു.
ഓണം ആഘോഷിക്കാൻ ജന്മനാട്ടിലേക്ക് എത്തുന്ന മലയാളികൾക്ക് ഈ തീരുമാനം വലിയ ആശ്വാസമാകുമെന്നാണ് പ്രതീക്ഷ. പ്രത്യേക സർവീസുകൾ അനുവദിച്ച കർണാടക സർക്കാരിനും ഗതാഗത മന്ത്രി ബി.എസ്. ബൈരതി സുരേഷിനും കെ.സി. വേണുഗോപാൽ നന്ദി രേഖപ്പെടുത്തി.
