കൊച്ചി: നടൻ മനോജ് കെ. ജയന്റെ മകൾ കുഞ്ഞാറ്റയുടെ ആദ്യ സിനിമയുടെ ചിത്രീകരണം ആരംഭിച്ചു. മകളുടെ ഏറെക്കാലത്തെ സിനിമാ സ്വപ്നം യാഥാർഥ്യമായ സന്തോഷം മനോജ് കെ. ജയൻ സമൂഹമാധ്യമത്തിലൂടെ പങ്കുവെച്ചു.
‘പ്രിയതമ N’ എന്നാണ് ചിത്രത്തിന് പേര്. ‘സുഖമായിരിക്കട്ടെ’ എന്ന ചിത്രത്തിന് ശേഷം റെജി പ്രഭാകർ സംവിധാനം ചെയ്യുന്ന ചിത്രത്തിൽ ശ്രീനാഥ് ഭാസിയാണ് നായകനാകുന്നത്. ശ്രീയനിധി ക്രിയേഷൻസിന്റെ ബാനറിൽ ശ്രീ സുനിൽകുമാറാണ് ചിത്രം നിർമിക്കുന്നത്.
കുഞ്ഞാറ്റയുടെ ആദ്യ സിനിമയുടെ ചിത്രീകരണം ആരംഭിച്ച ദിവസം തനിക്ക് ഏറെ സന്തോഷമുള്ള ദിവസമാണെന്ന് മനോജ് കെ. ജയൻ കുറിച്ചു. മകളുടെ സ്വപ്നം യാഥാർഥ്യമാകുന്നതിൽ സന്തോഷം പ്രകടിപ്പിച്ച അദ്ദേഹം ചിത്രത്തിന്റെ വിജയത്തിനായി പ്രാർഥിക്കുന്നതായും പറഞ്ഞു.
കുഞ്ഞാറ്റയ്ക്കും ചിത്രത്തിനും പ്രേക്ഷകരുടെ അനുഗ്രഹവും പ്രാർഥനയും പ്രോത്സാഹനവും ഉണ്ടാകണമെന്നും മനോജ് കെ. ജയൻ അഭ്യർഥിച്ചു.
