മെക്സിക്കോയിലെ ഗ്വാഡലൂപ്പിലുള്ള എസ്റ്റാഡിയോ ബിബിവിഎ സ്റ്റേഡിയത്തില്‍ നടന്ന 2026 ഫിഫ ലോകകപ്പ് ഗ്രൂപ്പ് എഫ് പോരാട്ടത്തില്‍ സ്വീഡന് ടുണീഷ്യക്കെതിരെ 2-1ന്റെ പോരാട്ടവിജയം. ഗ്രൂപ്പ് ഘട്ടത്തിലെ ആദ്യ മത്സരത്തില്‍ തന്നെ മൂന്ന് പോയിന്റ് സ്വന്തമാക്കിയ സ്വീഡന്‍, അടുത്ത റൗണ്ടിലേക്കുള്ള പ്രതീക്ഷകള്‍ ശക്തമാക്കി.

മത്സരത്തിന്റെ ഏഴാം മിനിറ്റില്‍ തന്നെ സ്വീഡന് ലീഡ് നേടി. ബ്രൈറ്റണ്‍ മിഡ്ഫീല്‍ഡറായ യാസിന്‍ അയാരി ബോക്‌സിന് പുറത്തുനിന്ന് തൊടുത്ത അതിശക്തമായ ലോംഗ് റേഞ്ച് ഷോട്ട് ടുണീഷ്യന്‍ ഗോള്‍കീപ്പര്‍ക്ക് തടയാനായില്ല. യുവതാരത്തിന്റെ തകര്‍പ്പന്‍ ഗോളിലൂടെ സ്വീഡന്‍ 1-0ന് മുന്നിലെത്തി.

30-ാം മിനിറ്റില്‍ സ്വീഡന്റെ ലീഡ് ഇരട്ടിയായി. വിക്ടര്‍ ഗ്യോക്കറസിന്റെ അസിസ്റ്റില്‍ അലക്സാണ്ടര്‍ ഐസക് കൃത്യമായ ഫിനിഷിലൂടെ പന്ത് വലയിലെത്തിച്ചു. സ്വീഡന്റെ മുന്നേറ്റനിരയിലെ ഐസക്-ഗ്യോക്കറസ് കൂട്ടുകെട്ടിന്റെ മികവ് വീണ്ടും തെളിയിച്ച ഗോളായിരുന്നു ഇത്.

എന്നാല്‍, ആദ്യ പകുതി അവസാനിക്കും മുമ്പ് ടുണീഷ്യ ശക്തമായ തിരിച്ചുവരവ് നടത്തി. 43-ാം മിനിറ്റില്‍ ഹന്നിബാള്‍ മെജ്ബ്രിയുടെ ക്രോസില്‍ നിന്ന് ഒമര്‍ റെകിക് നേടിയ ഹെഡ്ഡറിലൂടെ ടുണീഷ്യ സ്കോര്‍ 2-1 ആക്കി. ഇതോടെ രണ്ടാം പകുതിയിലേക്ക് മത്സരം ആവേശകരമായി നീങ്ങി.

രണ്ടാം പകുതിയില്‍ സമനില ഗോള്‍ ലക്ഷ്യമിട്ട് ടുണീഷ്യ ആക്രമണം ശക്തമാക്കിയെങ്കിലും സ്വീഡിഷ് പ്രതിരോധം ഉറച്ചുനിന്നു. ഗോള്‍കീപ്പര്‍ ക്രിസ്റ്റോഫര്‍ നോര്‍ഡ്ഫെല്‍ഡിന്റെ നേതൃത്വത്തിലുള്ള പ്രതിരോധനിര സമ്മര്‍ദത്തെ അതിജീവിച്ചതോടെ സ്വീഡന് വിജയം ഉറപ്പിച്ചു.

ഗ്രഹാം പോട്ടറിന്റെ പരിശീലനത്തിലുള്ള സ്വീഡന്‍, അലക്സാണ്ടര്‍ ഐസക്കും വിക്ടര്‍ ഗ്യോക്കറസും ഉള്‍പ്പെട്ട ആക്രമണനിരയുടെ മികവ് തുടക്കത്തില്‍ തന്നെ പ്രകടിപ്പിച്ചു. മറുവശത്ത് ഹന്നിബാള്‍ മെജ്ബ്രിയുടെ നേതൃത്വത്തില്‍ ടുണീഷ്യ പൊരുതിയെങ്കിലും സമനില കണ്ടെത്താനായില്ല.

ഗ്രൂപ്പ് എഫിലെ മറ്റൊരു മത്സരത്തില്‍ നെതര്‍ലന്‍ഡ്സും ജപ്പാനും 2-2ന് സമനിലയില്‍ പിരിഞ്ഞിരുന്നു. ഇതോടെ ആദ്യ മത്സരത്തിനു ശേഷം മൂന്ന് പോയിന്റുമായി സ്വീഡന്‍ ഗ്രൂപ്പില്‍ ശക്തമായ നിലപാട് സ്വന്തമാക്കി. ചൂടേറിയ കാലാവസ്ഥയില്‍ നടന്ന മത്സരത്തില്‍ സ്വീഡന്റെ അച്ചടക്കവും ആക്രമണ മികവും വിജയത്തില്‍ നിര്‍ണായകമായി.