തിരുവനന്തപുരം: കേരള സർക്കാരിന്റെ ലഹരിവിരുദ്ധ ദൗത്യമായ ‘ഓപ്പറേഷൻ തൂഫാൻ’ ക്യാമ്പയിനിൽ തമിഴ്നാട് മുഖ്യമന്ത്രി ജോസഫ് വിജയും പങ്കെടുക്കും. ക്യാമ്പയിന്റെ ബ്രാൻഡ് അംബാസഡറായ നടൻ മോഹൻലാലിനൊപ്പം വിജയ് വേദി പങ്കിടുമെന്ന് സർക്കാർ വൃത്തങ്ങൾ അറിയിച്ചു.
കേരള ആഭ്യന്തര മന്ത്രി രമേശ് ചെന്നിത്തല ചെന്നൈയിൽ തമിഴ്നാട് മുഖ്യമന്ത്രി ജോസഫ് വിജയുമായി നടത്തിയ കൂടിക്കാഴ്ചയ്ക്കു ശേഷമാണ് പ്രഖ്യാപനം. കേരള-തമിഴ്നാട് അതിർത്തിയിൽ ലഹരിക്കടത്ത് തടയുന്നതിനുള്ള സംയുക്ത പട്രോളിംഗ് ശക്തിപ്പെടുത്തൽ, രഹസ്യവിവര കൈമാറ്റം, ദക്ഷിണേന്ത്യൻ സംസ്ഥാനങ്ങളെ ഉൾപ്പെടുത്തി ലഹരിവിരുദ്ധ ഏകോപന സമിതി രൂപീകരിക്കൽ തുടങ്ങിയ വിഷയങ്ങൾ ചർച്ചയിൽ പ്രധാനമായി.
ആഴ്ചകൾക്ക് മുമ്പ് ആരംഭിച്ച ഓപ്പറേഷൻ തൂഫാൻ സംസ്ഥാനത്തുടനീളം വ്യാപക പരിശോധനകളും പ്രത്യേക റെയ്ഡുകളും നടത്തി ലഹരിമാഫിയക്കെതിരെ ശക്തമായ നടപടി തുടരുകയാണ്. ആയിരക്കണക്കിന് പേരെ അറസ്റ്റ് ചെയ്യുകയും നിരവധി കേസുകൾ രജിസ്റ്റർ ചെയ്യുകയും ചെയ്തിട്ടുണ്ട്. യുവാക്കളെ ലക്ഷ്യമിട്ട് സംഘടിപ്പിക്കുന്ന ഡിജെ പാർട്ടികൾ ഉൾപ്പെടെയുള്ള ഇടങ്ങളിൽ നടത്തിയ പരിശോധനകളിലും ലഹരി ശൃംഖലകൾക്കെതിരെ കർശന നടപടി സ്വീകരിച്ചതായി അധികൃതർ അറിയിച്ചു.
കേരളവും തമിഴ്നാടും ചേർന്ന് ലഹരിവ്യാപനത്തിനെതിരെ കൂടുതൽ ഏകോപിതമായ നടപടികൾ സ്വീകരിക്കുന്നതിന്റെ ഭാഗമായാണ് ജോസഫ് വിജയുടെ പങ്കാളിത്തം വിലയിരുത്തപ്പെടുന്നത്.
