പശ്ചിമ ബംഗാളിൽ പുതിയ സർക്കാർ രൂപീകരണത്തിനായുള്ള ഒരുക്കങ്ങൾ പുരോഗമിക്കുന്നതിനിടെ സംസ്ഥാന നിയമസഭ ഔദ്യോഗികമായി പിരിച്ചുവിട്ടു. ഭരണഘടനയിലെ ആർട്ടിക്കിൾ 174 പ്രകാരമുള്ള അധികാരം വിനിയോഗിച്ചാണ് പശ്ചിമ ബംഗാൾ ഗവർണർ ആർ.എൻ. രവി ഇന്നലെ നിലവിലെ നിയമസഭ പിരിച്ചുവിടുന്നതിനുള്ള ഉത്തരവ് പുറപ്പെടുവിച്ചത്.

ശനിയാഴ്ച പുതിയ സർക്കാർ സത്യപ്രതിജ്ഞ ചെയ്ത് അധികാരമേൽക്കുന്നതിനുള്ള നടപടികളുടെ ഭാഗമായി ഈ നടപടി നിർണായക ഘട്ടമായി കണക്കാക്കപ്പെടുന്നു. നിയമസഭ തിരഞ്ഞെടുപ്പിന് പിന്നാലെ അധികാര കൈമാറ്റ നടപടികൾ വേഗത്തിലായിരിക്കെ സംസ്ഥാന തലസ്ഥാനമായ കൊൽക്കത്തയിൽ രാഷ്ട്രീയ ചർച്ചകളും നീക്കങ്ങളും ശക്തമായിരിക്കുകയാണ്.

ഇതിനിടെ കേന്ദ്ര ആഭ്യന്തര മന്ത്രി അമിത് ഷാ ഇന്ന് കൊൽക്കത്തയിലെത്തും. പുതുതായി തിരഞ്ഞെടുക്കപ്പെട്ട ബി.ജെ.പി എം.എൽ.എമാരുടെ യോഗത്തിൽ അദ്ദേഹം പങ്കെടുക്കും. പാർട്ടിയുടെ നിയമസഭാ കക്ഷി നേതാവിനെ തിരഞ്ഞെടുക്കുന്നതിനുള്ള നിർണായക തീരുമാനം ഈ യോഗത്തിൽ ഉണ്ടാകുമെന്നാണ് സൂചന.

അടുത്ത രണ്ടു ദിവസങ്ങളിലെ രാഷ്ട്രീയ നീക്കങ്ങളാണ് സംസ്ഥാനത്തെ പുതിയ സർക്കാരിന്റെ നേതൃത്വവും ഭരണ ദിശയും നിർണയിക്കുകയെന്നാണു രാഷ്ട്രീയ നിരീക്ഷകരുടെ വിലയിരുത്തൽ.