കോട്ടയം: നഗരത്തിലെ രൂക്ഷമായ ഗതാഗതക്കുരുക്കിന് ശാശ്വത പരിഹാരം കണ്ടെത്തുന്നതിനുള്ള നടപടികളുടെ ഭാഗമായി ജില്ലാ കളക്ടർ ചേതൻകുമാർ മീണയുടെ നേതൃത്വത്തിലുള്ള ഉദ്യോഗസ്ഥ സമിതി വിവിധ കേന്ദ്രങ്ങളിൽ പരിശോധന ആരംഭിച്ചു. നിയമസഭാ സ്പീക്കർ തിരുവഞ്ചൂർ രാധാകൃഷ്ണന്റെ അധ്യക്ഷതയിൽ ജൂൺ ഒന്നിന് ചേർന്ന യോഗത്തിലെ തീരുമാനപ്രകാരമാണ് പരിശോധന നടത്തിയത്.
ജില്ലാ പോലീസ് മേധാവി എ. ഷാഹുൽ ഹമീദും വിവിധ വകുപ്പുകളിലെ ഉദ്യോഗസ്ഥരും ഉൾപ്പെട്ട സംഘം വ്യാഴാഴ്ച എം.സി. റോഡിൽ ചിങ്ങവനം മുതൽ പുളിമൂട് ജംഗ്ഷൻ വരെയുള്ള ഭാഗങ്ങളും കഞ്ഞിക്കുഴി പ്രദേശവും സന്ദർശിച്ച് ഗതാഗത പ്രശ്നങ്ങൾ നേരിട്ട് വിലയിരുത്തി. നഗരത്തിലെ തിരക്കേറിയ മേഖലകളിലെ ഗതാഗത ക്രമീകരണങ്ങൾ, റോഡ് സൗകര്യങ്ങൾ, തടസ്സങ്ങൾ എന്നിവ സമിതി പരിശോധിച്ചു.
പരിശോധനയ്ക്കിടെ നഗരസഭാ അധ്യക്ഷൻ എം.പി. സന്തോഷ് കുമാർ, കൗൺസിലർമാരായ എസ്. ഗോപകുമാർ, ധന്യ ഗിരീഷ്, കെ.കെ. പ്രസാദ്, സൂസൻ കെ. സേവ്യർ എന്നിവർ പങ്കെടുത്തു. വ്യാപാരികളും പൊതുജനങ്ങളും ഗതാഗതക്കുരുക്ക് കുറയ്ക്കുന്നതിനുള്ള വിവിധ നിർദേശങ്ങൾ സമിതിക്ക് മുന്നിൽ അവതരിപ്പിച്ചു.
നഗരത്തിലെ ശേഷിക്കുന്ന ഭാഗങ്ങളിലും വരും ദിവസങ്ങളിൽ പരിശോധന നടത്തുമെന്ന് ജില്ലാ കളക്ടർ അറിയിച്ചു. സമിതിയുടെ കരട് റിപ്പോർട്ടിനെ അടിസ്ഥാനമാക്കി വിശദമായ ചർച്ചകൾക്ക് ശേഷമായിരിക്കും അടിയന്തര പരിഷ്കാര നടപടികൾ നടപ്പാക്കുകയെന്ന് സ്പീക്കർ തിരുവഞ്ചൂർ രാധാകൃഷ്ണൻ നേരത്തെ വ്യക്തമാക്കിയിരുന്നു.
പരിശോധനാ സംഘത്തിൽ കോട്ടയം ആർ.ടി.ഒ ഡി. ജയരാജ്, പൊതുമരാമത്ത് വകുപ്പ് ദേശീയപാത വിഭാഗം എക്സിക്യൂട്ടീവ് എൻജിനീയർ ജോൺ കെന്നത്ത്, നിരത്ത് വിഭാഗം എക്സിക്യൂട്ടീവ് എൻജിനീയർ ടി.എസ്. ജയരാജ്, വാട്ടർ അതോറിറ്റി എക്സിക്യൂട്ടീവ് എൻജിനീയർ അനിൽ രാജ്, നാർക്കോട്ടിക് സെൽ ഡിവൈ.എസ്.പി കെ.ആർ. ബൈജു, ദേശീയപാതാ വിഭാഗം അസിസ്റ്റന്റ് എക്സിക്യൂട്ടീവ് എൻജിനീയർ എ.എസ്. സുര, വാട്ടർ അതോറിറ്റി അസിസ്റ്റന്റ് എക്സിക്യൂട്ടീവ് എൻജിനീയർ ബാസ്റ്റിൻ ജോൺ, പൊതുമരാമത്ത് വകുപ്പ് മെയിന്റനൻസ് വിഭാഗം അസിസ്റ്റന്റ് എക്സിക്യൂട്ടീവ് എൻജിനീയർ മായ കെ. നായർ, കെ.എസ്.ഇ.ബി അസിസ്റ്റന്റ് എക്സിക്യൂട്ടീവ് എൻജിനീയർ വിജി പ്രഭാകരൻ, നഗരസഭാ സെക്രട്ടറി ബി. അനിൽകുമാർ എന്നിവരും പങ്കെടുത്തു.
