കോഴിക്കോട്: തിരുവമ്പാടി നിയോജക മണ്ഡലത്തിലെ യാത്രക്കാർക്ക് ആശ്വാസമായി രണ്ട് പുതിയ കെ.എസ്.ആർ.ടി.സി പ്രിയദർശിനി ബസ് സർവീസുകൾ ഒക്ടോബർ 14 ബുധനാഴ്ച മുതൽ ആരംഭിക്കും. തിരുവമ്പാടി എംഎൽഎ കാസിം സി കെ ആണ് ഇക്കാര്യം അറിയിച്ചത്.
ചെറുവാടി വഴിയും മണാശ്ശേരി എം.എ.എം.ഒ കോളേജ് വഴിയും കോഴിക്കോട്ടേക്കാണ് പുതിയ സർവീസുകൾ ആരംഭിക്കുന്നത്. കോഴിക്കോട് റെയിൽവേ സ്റ്റേഷനുമായി ബന്ധിപ്പിച്ചുള്ള യാത്രാസൗകര്യം വിദ്യാർഥികൾക്കും പൊതുജനങ്ങൾക്കും ഏറെ പ്രയോജനപ്പെടുമെന്ന് എംഎൽഎ വ്യക്തമാക്കി.
തിരുവമ്പാടി മണ്ഡലത്തിലെ ജനങ്ങളുടെ ദീർഘകാല ആവശ്യത്തെ തുടർന്നാണ് രണ്ട് സർവീസുകൾക്കും അനുമതി ലഭിച്ചത്. വിവിധ പ്രതിസന്ധികളും കടമ്പകളും മറികടന്നാണ് പദ്ധതി യാഥാർഥ്യമാകുന്നതെന്നും അദ്ദേഹം അറിയിച്ചു.
വിദ്യാഭ്യാസം, തൊഴിൽ, ചികിത്സ തുടങ്ങിയ ആവശ്യങ്ങൾക്കായി കോഴിക്കോട്ടേക്ക് യാത്ര ചെയ്യുന്നവർക്ക് പുതിയ സർവീസുകൾ കൂടുതൽ സൗകര്യമൊരുക്കും. യാത്രാക്ലേശം കുറയ്ക്കാനും പൊതുഗതാഗത സൗകര്യം മെച്ചപ്പെടുത്താനും ഇതിലൂടെ കഴിയുമെന്നാണ് പ്രതീക്ഷ.
പുതിയ സർവീസുകൾ പരമാവധി പ്രയോജനപ്പെടുത്തണമെന്ന് കാസിം സി കെ യാത്രക്കാരോട് അഭ്യർഥിച്ചു.
