തിരുവനന്തപുരം – യുഡിഎഫ് ചെയർമാൻ കൂടിയായ മുഖ്യമന്ത്രി വി.ഡി. സതീശന്റെ ഏകപക്ഷീയമായ തീരുമാനങ്ങൾക്കെതിരെ യുഡിഎഫ് കൺവീനർ അടൂർ പ്രകാശ് പരസ്യവിമർശനം ഉന്നയിച്ചതോടെ കോൺഗ്രസിലും മുന്നണിയിലും ആഭ്യന്തര പ്രതിസന്ധി രൂക്ഷമായി. കെപിസിസി ആസ്ഥാനത്ത് വിളിച്ച വാർത്താസമ്മേളനത്തിലായിരുന്നു വിമർശനം.
മുന്നണിയിലോ പാർട്ടിയിലോ ചർച്ചയോ കൂടിയാലോചനയോ നടത്താതെയാണ് സർക്കാർ സുപ്രധാന തീരുമാനങ്ങൾ എടുക്കുന്നതെന്ന് അടൂർ പ്രകാശ് ആരോപിച്ചു. പല തീരുമാനങ്ങളും താൻ അറിയുന്നത് മാധ്യമങ്ങളിലൂടെയാണെന്നും അദ്ദേഹം പറഞ്ഞു.
അടുത്തിടെ നടത്തിയ ക്യാബിനറ്റ് റാങ്കോടെയുള്ള നിയമനങ്ങളാണ് പെട്ടെന്നുള്ള പ്രകോപനത്തിന് കാരണം. മുസ്ലിം ലീഗ് നേതാവ് എം.കെ. മുനീറിനെ ഭരണപരിഷ്കാര കമ്മീഷൻ അധ്യക്ഷനായും ഫോർവേഡ് ബ്ലോക്ക് നേതാവ് ജി. ദേവരാജനെ ഡൽഹിയിലെ സംസ്ഥാന സർക്കാരിന്റെ പ്രത്യേക പ്രതിനിധിയായും നിയമിച്ചത് കൺവീനറായ തന്നോട് ആലോചിക്കാതെയാണെന്ന് അദ്ദേഹം വ്യക്തമാക്കി. യുഡിഎഫ് യോഗം വിളിച്ചുചേർക്കാൻ ചെയർമാൻ മുൻകൈ എടുക്കുന്നില്ലെന്നും അദ്ദേഹം കുറ്റപ്പെടുത്തി.
എഐസിസി നേരിട്ട് നിയമിച്ച കൺവീനർ എന്ന നിലയിൽ തന്റെ അതൃപ്തിയും മുന്നണിയിലെ ഏകോപനമില്ലായ്മയും കത്തിലൂടെ ഹൈക്കമാൻഡിനെ അറിയിക്കുമെന്നും അടൂർ പ്രകാശ് പറഞ്ഞു.
മുഖ്യമന്ത്രിയുടെ പ്രവർത്തനശൈലി, ചാർട്ടേഡ് വിമാനയാത്രകൾ, സുതാര്യതക്കുറവ് എന്നിവയ്ക്കെതിരെ കൂടുതൽ കോൺഗ്രസ് നേതാക്കൾ രംഗത്തുവന്നിട്ടുണ്ട്. മുൻ സർക്കാരിന്റെ രീതികൾ സതീശൻ പിന്തുടരുന്നത് പാർട്ടിക്ക് ദോഷം ചെയ്യുമെന്ന് ചില മുതിർന്ന നേതാക്കൾ അഭിപ്രായപ്പെടുന്നു. എഐസിസി ജനറൽ സെക്രട്ടറി കെ.സി. വേണുഗോപാലിനെ അനുകൂലിക്കുന്ന വലിയൊരു വിഭാഗത്തിന്റെ അതൃപ്തിയും ഇതിന് പിന്നിലുണ്ടെന്നാണ് സൂചന.
അതേസമയം, ആരോപണങ്ങൾ സതീശനെ അനുകൂലിക്കുന്നവർ തള്ളി. നേരത്തേ തന്നെ ധാരണയായ വിഷയത്തിലാണ് അടൂർ പ്രകാശ് അനാവശ്യ വിവാദമുണ്ടാക്കുന്നതെന്ന് അവർ വാദിക്കുന്നു.
പുതിയ യുഡിഎഫ് സർക്കാർ അധികാരമേറ്റ് നാല് മാസം തികയുന്ന വേളയിലാണ് ഭിന്നത പരസ്യമായത്.
