തിരുവനന്തപുരം: സെക്രട്ടേറിയറ്റിന് മുന്നിൽ 17 ദിവസമായി യു.പി.എസ്.ടി റാങ്ക് ഹോൾഡേഴ്സ് അസോസിയേഷൻ നടത്തി വന്ന സമരം പിൻവലിച്ചു. റാങ്ക് ലിസ്റ്റിന്റെ കാലാവധി അവസാനിക്കുന്ന സാഹചര്യത്തിൽ കൂടുതൽ ഉദ്യോഗാർഥികൾക്ക് നിയമനം ലഭ്യമാക്കുന്നതിനായി കാലാവധി നീട്ടുന്ന കാര്യം അനുഭാവപൂർവം പരിഗണിക്കുമെന്ന് വിദ്യാഭ്യാസ മന്ത്രി എൻ. ഷംസുദ്ദീൻ ഉറപ്പ് നൽകിയതോടെയാണ് സമരം പിൻവലിച്ചത്.

ഒഴിവുകൾ റിപ്പോർട്ട് ചെയ്യാതെ പി.എസ്.സി നിരന്തരം പുതിയ വിജ്ഞാപനങ്ങൾ പുറപ്പെടുവിക്കുന്നത് നിർത്തിവെക്കണമെന്നതായിരുന്നു സമരക്കാരുടെ പ്രധാന ആവശ്യങ്ങളിലൊന്ന്. ഈ ആവശ്യം പരിഗണിക്കുമെന്നും മന്ത്രി ഉറപ്പ് നൽകി.

എച്ച്.ടി.വി തസ്തികയിൽ പി.എസ്.സി വഴി ഉദ്യോഗാർഥികളെ നിയമിക്കണമെന്ന ആവശ്യത്തിലും, തസ്തിക നഷ്ടപ്പെടുന്ന സർക്കാർ സ്കൂളുകളിലെ അധ്യാപക-വിദ്യാർഥി അനുപാതവുമായി ബന്ധപ്പെട്ട വിഷയങ്ങളിലും കൂടുതൽ പഠനം ആവശ്യമാണെന്ന് മന്ത്രി അറിയിച്ചു. ഇതിനായി 45 ദിവസത്തെ സമയം ആവശ്യപ്പെട്ടതായും സമരക്കാരെ അറിയിച്ചു.

മോഡൽ റസിഡൻഷ്യൽ സ്കൂളുകളിലും ഫിഷറീസ് സ്കൂളുകളിലും യു.പി തലത്തിൽ അധ്യാപകരുടെ കുറവുണ്ടെന്ന് റാങ്ക് ഹോൾഡേഴ്സ് അസോസിയേഷൻ പ്രതിനിധികൾ മന്ത്രിയുടെ ശ്രദ്ധയിൽപ്പെടുത്തി. തുടർന്ന് ഈ സ്കൂളുകളിൽ അതത് ജില്ലകളിലെ നിലവിലുള്ള യു.പി സ്കൂൾ റാങ്ക് ലിസ്റ്റിൽനിന്ന് നിയമനം നടത്തുന്നതിനുള്ള സാഹചര്യം പരിശോധിച്ച് ആവശ്യമായ നടപടി സ്വീകരിക്കാൻ പൊതുവിദ്യാഭ്യാസ ഡയറക്ടർക്ക് മന്ത്രി നിർദേശം നൽകി.

സർക്കാർ ഉറപ്പുകൾ ലഭിച്ചതിനെ തുടർന്നാണ് 17 ദിവസം നീണ്ടുനിന്ന സമരം അവസാനിപ്പിക്കാൻ റാങ്ക് ഹോൾഡേഴ്സ് അസോസിയേഷൻ തീരുമാനിച്ചത്.