തിരുവനന്തപുരം: അമ്പൂരി കുമ്പിച്ചൽകടവ് പാലത്തിന് അനുബന്ധമായി നിർമ്മിക്കുന്ന ‘വി പാർക്ക്’ പദ്ധതിയുടെ ഒന്നാംഘട്ട നിർമാണ പ്രവർത്തനങ്ങൾക്ക് തുടക്കമായി. പാറശ്ശാല എംഎൽഎ സി.കെ. ഹരീന്ദ്രന്റെ നേതൃത്വത്തിലാണ് പദ്ധതിയുടെ ഒന്നാംഘട്ട പ്രവർത്തനങ്ങളുടെ ഉദ്ഘാടനം നടന്നത്.
കുമ്പിച്ചൽകടവ് പാലത്തിന് താഴെയും പരിസരത്തുമായി നിലവിൽ ഉപയോഗശൂന്യമായി കിടക്കുന്ന സ്ഥലങ്ങളെ ജനങ്ങൾക്ക് പ്രയോജനപ്രദവും ആകർഷകവുമായ പൊതുഇടമാക്കി മാറ്റുകയാണ് പദ്ധതിയുടെ ലക്ഷ്യം. വിനോദത്തിനും വിശ്രമത്തിനും വ്യായാമത്തിനും മാനസിക ഉല്ലാസത്തിനും ഒരുപോലെ ഉപയോഗപ്പെടുത്താവുന്ന തരത്തിലാണ് പാർക്ക് വിഭാവനം ചെയ്തിരിക്കുന്നത്.
രണ്ട് ഘട്ടങ്ങളിലായി വിവിധ സൗകര്യങ്ങൾ ഇവിടെ ഒരുക്കും. നടപ്പാത, തുറന്ന വ്യായാമകേന്ദ്രം, കളിസ്ഥലം, കലാപ്രകടനങ്ങൾക്കുള്ള വേദി, യോഗ–ധ്യാന കേന്ദ്രം, ചെസ് കളിക്കാനുള്ള സൗകര്യം, ഭക്ഷണശാല, പൂന്തോട്ടം, ഇരിപ്പിടങ്ങൾ, കുട്ടികളുടെ പാർക്ക്, ബോട്ട് ക്ലബ്ബ് തുടങ്ങിയവയാണ് പദ്ധതിയിൽ ഉൾപ്പെടുത്തിയിരിക്കുന്നത്.
കുടുംബങ്ങൾക്കും കുട്ടികൾക്കും യുവാക്കൾക്കും മുതിർന്നവർക്കും ഒരുപോലെ പ്രയോജനപ്പെടുന്ന തരത്തിലാണ് പാർക്കിന്റെ രൂപകൽപ്പന. വ്യായാമത്തിനും കായിക വിനോദങ്ങൾക്കും കലാപരിപാടികൾക്കും പ്രകൃതിഭംഗി ആസ്വദിക്കുന്നതിനുമുള്ള സൗകര്യങ്ങൾ ഇവിടെ ഒരുക്കും.
നിലവിൽ മാലിന്യം നിക്ഷേപിക്കുന്നതിനും സാമൂഹ്യവിരുദ്ധ പ്രവർത്തനങ്ങൾക്കും സാധ്യതയുള്ള ഉപയോഗശൂന്യമായ പ്രദേശത്തെ സജീവവും സുരക്ഷിതവുമായ പൊതുസ്ഥലമാക്കി മാറ്റുന്നതും പദ്ധതിയുടെ ലക്ഷ്യമാണ്.
ടൂറിസം വകുപ്പിന്റെ മേൽനോട്ടത്തിലാണ് പദ്ധതി നടപ്പാക്കുന്നത്. നിർമ്മാണ ചുമതല ഹിന്ദുസ്ഥാൻ ലൈഫ് കെയർ ലിമിറ്റഡിനാണ്. പദ്ധതി പൂർത്തിയാകുന്നതോടെ കുമ്പിച്ചൽകടവ് പാലവും പരിസരവും കൂടുതൽ ആകർഷകമായ വിനോദസഞ്ചാര–വിശ്രമ കേന്ദ്രമായി മാറുമെന്നാണ് പ്രതീക്ഷ.
അമ്പൂരിയുടെ പ്രകൃതിഭംഗിയും കുമ്പിച്ചൽകടവ് പാലത്തിന്റെ സവിശേഷതകളും പ്രയോജനപ്പെടുത്തി വികസിപ്പിക്കുന്ന ‘വി പാർക്ക്’ പദ്ധതി പ്രദേശവാസികൾക്കും വിനോദസഞ്ചാരികൾക്കും ഒരുപോലെ പ്രയോജനപ്പെടുന്ന പുതിയ പൊതുഇടമായി മാറുമെന്നാണ് പ്രതീക്ഷിക്കുന്നത്.
