ചെന്നൈ: തമിഴ് സിനിമാ താരം കൂടിയായ തമിഴക വെട്രി കഴകം (ടിവികെ) അധ്യക്ഷൻ സി. ജോസഫ് വിജയിയെ തമിഴ്നാട് ഗവർണർ ആർ.വി. അർലേക്കർ മുഖ്യമന്ത്രിയായി നിയമിച്ചു. ചെന്നൈയിലെ ലോക് ഭവനിൽ നടന്ന ചടങ്ങിലാണ് ഗവർണർ നിയമന ഉത്തരവ് വിജയിക്ക് കൈമാറിയത്. വെള്ള ഷർട്ട് ധരിച്ചെത്തിയ വിജയ് ഗവർണറിൽ നിന്ന് ഉത്തരവ് സ്വീകരിച്ച് കൈകോർക്കുന്ന ദൃശ്യങ്ങൾ പുറത്തുവന്നു. തുടർന്ന് നേതാക്കളോടൊപ്പം ഗ്രൂപ്പ് ചിത്രങ്ങളും എടുത്തു.

2026 തമിഴ്നാട് നിയമസഭാ തിരഞ്ഞെടുപ്പിൽ ആദ്യമായി മത്സരിച്ച ടിവികെ 234 അംഗ സഭയിൽ 108 സീറ്റുകൾ നേടി ഏറ്റവും വലിയ ഒറ്റകക്ഷിയായി മാറിയിരുന്നു. ഭൂരിപക്ഷത്തിനാവശ്യമായ 118 സീറ്റുകളിൽ നിന്ന് 10 സീറ്റുകൾ കുറവായിരുന്നെങ്കിലും കോൺഗ്രസിന്റെയും ഇടത് കക്ഷികളുടെയും പിന്തുണ ലഭിച്ചതോടെ വിജയ് സർക്കാർ രൂപീകരിക്കാൻ അവകാശവാദം ഉന്നയിക്കുകയായിരുന്നു.

ഡി.എം.കെ–എ.ഐ.എ.ഡി.എം.കെ അധീനതയിലായിരുന്ന ദീർഘകാല ദ്രാവിഡ രാഷ്ട്രീയ ആധിപത്യത്തിന് വിരാമമിടുന്നതാണ് ടിവികെയുടെ ഉയർച്ചയെന്നാണ് രാഷ്ട്രീയ നിരീക്ഷകർ വിലയിരുത്തുന്നത്. ഏകദേശം 35 ശതമാനം വോട്ട് വിഹിതം നേടിയ ടിവികെ സംസ്ഥാന രാഷ്ട്രീയത്തിൽ വലിയ അട്ടിമറിയാണ് സൃഷ്ടിച്ചതെന്നും വിലയിരുത്തപ്പെടുന്നു.

സിനിമയിൽ നിന്ന് രാഷ്ട്രീയത്തിലേക്ക് എത്തിയ 51കാരനായ വിജയ് സുതാര്യ ഭരണവും വികസനവും അഴിമതിവിരുദ്ധ നിലപാടുകളും മുൻനിർത്തിയാണ് രാഷ്ട്രീയ പ്രവർത്തനം മുന്നോട്ടുകൊണ്ടുപോകുന്നത്. എം.ജി. രാമചന്ദ്രനെ പോലുള്ള സിനിമാതാര രാഷ്ട്രീയ നേതാക്കളുമായി വിജയിയുടെ ഉയർച്ചയെ താരതമ്യം ചെയ്യുന്നതും ശ്രദ്ധേയമാണ്.

സത്യപ്രതിജ്ഞാ ചടങ്ങിനുള്ള ഒരുക്കങ്ങൾ പുരോഗമിക്കുകയാണെന്നും മന്ത്രിസഭാ രൂപീകരണവുമായി ബന്ധപ്പെട്ട കൂടുതൽ വിവരങ്ങൾ ഉടൻ പുറത്തുവരുമെന്നുമാണ് റിപ്പോർട്ടുകൾ.