കണ്ണൂർ: ജില്ലയിലെ എല്ലാ പടക്കക്കടകളും ഇന്ന് മുതൽ 2026 മെയ് 5 വരെ അടച്ചിടാൻ ജില്ലാ കളക്ടർ അരുൺ കെ വിജയൻ ഉത്തരവിട്ടു. സുരക്ഷാ മുൻകരുതലുകളുടെ ഭാഗമായി ജില്ലാ കളക്ടറുടെ നിർദേശപ്രകാരമാണ് നടപടി സ്വീകരിച്ചിരിക്കുന്നത്.
അനുമതിപത്രങ്ങളുടെ പരിശോധന, സുരക്ഷാ മാനദണ്ഡങ്ങളുടെ പാലനം, പടക്ക ശേഖരണ സംവിധാനങ്ങളുടെ പരിശോധന എന്നിവ പൂർത്തിയാകുന്നതുവരെ കടകൾ പ്രവർത്തിക്കരുതെന്നും അധികൃതർ അറിയിച്ചു. നിർദേശം ലംഘിക്കുന്ന കടകൾക്കെതിരെ കർശന നിയമനടപടികൾ സ്വീകരിക്കുമെന്നും മുന്നറിയിപ്പ് നൽകിയിട്ടുണ്ട്.
സമീപകാലത്ത് സംസ്ഥാനത്തിന്റെ വിവിധ ഭാഗങ്ങളിൽ ഉണ്ടായ പടക്ക അപകടങ്ങളുടെ പശ്ചാത്തലത്തിലാണ് ജില്ലാ ഭരണകൂടം കടുത്ത നിയന്ത്രണങ്ങൾ ഏർപ്പെടുത്തിയിരിക്കുന്നത്. പൊലീസ്, ഫയർഫോഴ്സ്, എക്സ്പ്ലോസീവ് വിഭാഗം എന്നിവ സംയുക്തമായാണ് പരിശോധനകൾ നടത്തുന്നത്.
