കണ്ണൂർ: കണ്ണൂർ തളാപ്പിലെ കൊയിലി ആശുപത്രിക്ക് മുന്നിൽ സ്വകാര്യ ആശുപത്രി നഴ്സുമാർ നടത്തുന്ന മിനിമം വേതന സമരം ചൊവ്വാഴ്ച വൻ സംഘർഷത്തിൽ കലാശിച്ചു. ഒ.പി. വിഭാഗത്തിന് മുന്നിൽ പ്രതിഷേധിച്ച നഴ്സുമാർ മെഡിക്കൽ സൂപ്രണ്ട് ഡോ. പി. കെ. ഗംഗാധരൻ നായരെ മണിക്കൂറുകളോളം തടഞ്ഞുവെച്ചതിനെ തുടർന്ന് സ്ഥലത്ത് സംഘർഷാവസ്ഥ രൂപപ്പെട്ടു.

പൊലീസിന്റെ സഹായത്തോടെ മെഡിക്കൽ സൂപ്രണ്ടിനെ പുറത്തേക്ക് കൊണ്ടുപോകാൻ ശ്രമിക്കുന്നതിനിടെ സമരക്കാരും സൂപ്രണ്ടും തമ്മിൽ തെരുവിൽ ഉന്തുംതള്ളുണ്ടായി. മെഡിക്കൽ സൂപ്രണ്ട് തങ്ങളെ മർദിക്കാൻ ശ്രമിക്കുകയും മോശമായി പെരുമാറുകയും ചെയ്തുവെന്ന് നഴ്സുമാർ ആരോപിച്ചു. സംഭവത്തെ തുടർന്ന് ആശുപത്രി പരിസരത്ത് വൻ പൊലീസ് സന്നാഹം വിന്യസിച്ചു.

കഴിഞ്ഞ രണ്ട് മാസമായി കണ്ണൂരിലെ സ്വകാര്യ ആശുപത്രി നഴ്സുമാർ മിനിമം 40,000 രൂപ വേതനം ഉൾപ്പെടെയുള്ള ആവശ്യങ്ങൾ ഉന്നയിച്ച് സമരം തുടരുകയാണ്. ജില്ലാ കളക്ടറുടെയും എംഎൽഎയുടെയും മധ്യസ്ഥതയിൽ നടന്ന ചർച്ചയിൽ കണ്ണൂർ നഗരത്തിലെ അഞ്ച് പ്രമുഖ സ്വകാര്യ ആശുപത്രികൾ ശമ്പള വർധനവ് അംഗീകരിച്ച് കരാറിൽ ഒപ്പുവെച്ചിരുന്നു.

എന്നാൽ കൊയിലി ആശുപത്രി മാനേജ്മെന്റ് മാത്രം നഴ്സുമാരുടെ ആവശ്യങ്ങൾ അംഗീകരിക്കാനോ കരാറിൽ ഒപ്പിടാനോ തയ്യാറാകാത്തതോടെയാണ് പ്രതിഷേധം കൂടുതൽ ശക്തമായത്. ഇതോടെ മറ്റ് സ്വകാര്യ ആശുപത്രികളിലെ നഴ്സുമാരും കൊയിലി ആശുപത്രിക്ക് മുന്നിലെ സമരത്തിൽ പങ്കുചേർന്ന് ഐക്യദാർഢ്യം പ്രഖ്യാപിച്ചു.

മിനിമം വേതനം ഉൾപ്പെടെയുള്ള ആവശ്യങ്ങളിൽ മാനേജ്മെന്റ് അനുകൂല തീരുമാനം കൈക്കൊള്ളാത്ത പക്ഷം സമരം കൂടുതൽ ശക്തമാക്കുമെന്ന് നഴ്സസ് സംഘടനകൾ മുന്നറിയിപ്പ് നൽകി. അതേസമയം, സംഭവത്തിൽ ആശുപത്രി മാനേജ്മെന്റിന്റെ ഔദ്യോഗിക പ്രതികരണവും തുടർചർച്ചകളുടെ ഫലവും കാത്തിരിക്കുകയാണ്.