തിരുവനന്തപുരം: ഓണപ്പരീക്ഷയുടെ പേരിൽ വിദ്യാർത്ഥികളെ തെറ്റിദ്ധരിപ്പിക്കുന്ന തരത്തിലുള്ള സോഷ്യൽ മീഡിയ പ്രചാരണങ്ങൾക്കെതിരെ അടിയന്തര നടപടി ആവശ്യപ്പെട്ട് പൊതുവിദ്യാഭ്യാസ മന്ത്രി എൻ. ഷംസുദ്ദീന്റെ പ്രൈവറ്റ് സെക്രട്ടറി സംസ്ഥാന പോലീസ് മേധാവിക്ക് പരാതി നൽകി. മന്ത്രി എൻ. ഷംസുദ്ദീൻ പങ്കുവച്ച പോസ്റ്റിലൂടെയാണ് ഇക്കാര്യം അറിയിച്ചത്.
ഇൻസ്റ്റഗ്രാം, യൂട്യൂബ് തുടങ്ങിയ സാമൂഹിക മാധ്യമങ്ങളിൽ നിരവധി അധ്യാപകരും വിദ്യാഭ്യാസ ചാനലുകളും വിദ്യാർത്ഥികൾക്കായി പഠന ക്ലാസുകൾ നൽകുന്നുണ്ട്. എന്നാൽ ഇതിന്റെ മറവിൽ ചില സോഷ്യൽ മീഡിയ ചാനലുകൾ പരീക്ഷയുമായി ബന്ധപ്പെട്ട് തെറ്റിദ്ധരിപ്പിക്കുന്ന അവകാശവാദങ്ങൾ പ്രചരിപ്പിക്കുന്നതായി പരാതിയിൽ ചൂണ്ടിക്കാട്ടുന്നു.
“ചോദ്യപേപ്പർ തരാം”, “ഞങ്ങൾ പറയുന്ന ചോദ്യങ്ങൾ മാത്രമേ പരീക്ഷയിൽ വരൂ”, “നാളെ വരുന്ന മോഡൽ ചോദ്യപേപ്പർ ഇതുതന്നെയായിരിക്കും”, “ഇത് മാത്രം പഠിച്ചാൽ മതി” തുടങ്ങിയ അവകാശവാദങ്ങളാണ് ചില വീഡിയോകളിലൂടെയും പോസ്റ്റുകളിലൂടെയും പ്രചരിപ്പിക്കുന്നതെന്നാണ് പരാതി.
ഇത്തരം പ്രചാരണങ്ങൾ വിദ്യാർത്ഥികളിൽ തെറ്റായ പ്രതീക്ഷയും പരീക്ഷയെക്കുറിച്ചുള്ള തെറ്റിദ്ധാരണയും സൃഷ്ടിക്കുന്നതായി പരാതിയിൽ പറയുന്നു. യഥാർഥ പഠനത്തിന് പകരം പരീക്ഷയുടെ തലേദിവസം ലഭിക്കുമെന്ന് അവകാശപ്പെടുന്ന ചോദ്യങ്ങൾ മാത്രം പഠിച്ചാൽ മതിയെന്ന തെറ്റായ ധാരണയിലേക്ക് കുട്ടികളെ നയിക്കാനും ഇത് ഇടയാക്കും.
വിദ്യാർത്ഥികളെ വിവിധ സോഷ്യൽ മീഡിയ ഗ്രൂപ്പുകളിലേക്കും പ്ലാറ്റ്ഫോമുകളിലേക്കും എത്തിക്കുന്നതിനും അവരുടെ വ്യക്തിഗത വിവരങ്ങളും മറ്റ് ഡാറ്റയും ശേഖരിക്കുന്നതിനും ഇത്തരം അവകാശവാദങ്ങൾ ഉപയോഗിക്കുന്നുണ്ടോ എന്നതും പരിശോധിക്കണമെന്ന് പരാതിയിൽ ആവശ്യപ്പെട്ടു.
ആവശ്യപ്പെട്ട നടപടികൾ
ചോദ്യപേപ്പർ നൽകാമെന്നോ പരീക്ഷയിൽ പ്രത്യേക ചോദ്യങ്ങൾ തന്നെ വരുമെന്നോ അവകാശപ്പെട്ട് വിദ്യാർത്ഥികളെ തെറ്റിദ്ധരിപ്പിക്കുന്ന സോഷ്യൽ മീഡിയ ചാനലുകളെക്കുറിച്ച് അന്വേഷണം നടത്തണമെന്നാണ് പ്രധാന ആവശ്യം. അവകാശവാദങ്ങൾ തെറ്റാണെന്ന് കണ്ടെത്തിയാൽ നിയമാനുസൃത നടപടി സ്വീകരിക്കണമെന്നും ആവശ്യപ്പെട്ടു.
വിദ്യാർത്ഥികളുടെ വ്യക്തിഗത വിവരങ്ങൾ ശേഖരിക്കുന്നതിനായി ഇത്തരം രീതികൾ ദുരുപയോഗം ചെയ്യുന്നുണ്ടോ എന്ന് പരിശോധിക്കണമെന്നും, വിദ്യാർത്ഥികളും രക്ഷിതാക്കളും അധ്യാപകരും വ്യാജ പ്രചാരണങ്ങളിൽ വീഴാതിരിക്കാൻ ഔദ്യോഗിക മുന്നറിയിപ്പ് നൽകണമെന്നും പരാതിയിൽ ആവശ്യപ്പെട്ടു.
അതേസമയം, അധ്യാപകർ നടത്തുന്ന സാധാരണ ഓൺലൈൻ പഠന ക്ലാസുകൾക്ക് തടസ്സമുണ്ടാകാത്തവിധം, ചോദ്യപേപ്പർ ലഭ്യമാക്കുമെന്നോ അതേ ചോദ്യങ്ങൾ പരീക്ഷയിൽ വരുമെന്നോ ഉറപ്പുനൽകി വിദ്യാർത്ഥികളെ തെറ്റിദ്ധരിപ്പിക്കുന്ന പ്രവണത മാത്രമാണ് നിയന്ത്രിക്കേണ്ടതെന്നും പരാതിയിൽ വ്യക്തമാക്കിയിട്ടുണ്ട്.
ഓണപ്പരീക്ഷകൾ പുരോഗമിക്കുന്ന സാഹചര്യത്തിൽ വിഷയം വിദ്യാർത്ഥികളുടെ പഠനത്തെയും പരീക്ഷയുടെ വിശ്വാസ്യതയെയും നേരിട്ട് ബാധിക്കാവുന്നതാണെന്നും, അതിനാൽ അടിയന്തരമായി ഇടപെടണമെന്നും പ്രൈവറ്റ് സെക്രട്ടറി സംസ്ഥാന പോലീസ് മേധാവിയോട് ആവശ്യപ്പെട്ടു.
