ബെംഗളൂരു: രാജ്യത്തെ ഐസ്ക്രീം വിപണിയിലേക്ക് റിലയൻസ് കൺസ്യൂമർ പ്രോഡക്ട്സ് ലിമിറ്റഡ് (ആർ.സി.പി.എൽ.) പ്രവേശിച്ചു. റിലയൻസ് ഇൻഡസ്ട്രീസിന്റെ ഉപഭോക്തൃ ഉൽപ്പന്ന വിഭാഗമായ ആർ.സി.പി.എൽ. പുതിയ ബ്രാൻഡായ ‘ബോംബെ ക്രീമറി’ സെപ്റ്റംബർ ഒന്നിന് പുറത്തിറക്കി.
യഥാർഥ പാലിന്റെ ക്രീം ഉൾപ്പെടെയുള്ള ഗുണമേന്മയുള്ള ഡയറി ചേരുവകൾ ഉപയോഗിച്ചാണ് ഉൽപ്പന്നങ്ങൾ തയ്യാറാക്കുന്നതെന്ന് കമ്പനി അറിയിച്ചു. ‘ആഗോള നിലവാരം, താങ്ങാവുന്ന വില’ എന്ന ആശയത്തിലാണ് ബ്രാൻഡ് വിപണിയിലെത്തുന്നത്. ₹10 മുതലാണ് ഐസ്ക്രീമുകളുടെ വില.
കോൺ, കപ്പ്, ടബ്, ബാർ, സ്റ്റിക്ക് തുടങ്ങിയ വിവിധ രൂപങ്ങളിൽ ബോംബെ ക്രീമറി ഐസ്ക്രീമുകൾ ലഭ്യമാകും. ആദ്യഘട്ടത്തിൽ പശ്ചിമ ഇന്ത്യയിലാണ് വിതരണം. വൈകാതെ രാജ്യവ്യാപകമായി ലഭ്യമാക്കുമെന്ന് ആർ.സി.പി.എൽ. അറിയിച്ചു.
“ഡയറി ഉൽപ്പന്നങ്ങൾക്ക് ഗുണനിലവാരത്തിൽ വിട്ടുവീഴ്ച വേണ്ട എന്ന ലളിതമായ ആശയത്തിലാണ് ബോംബെ ക്രീമറി രൂപപ്പെടുത്തിയത്. യഥാർഥ ഡയറി ക്രീം ഉപയോഗിച്ച് ഓരോ തവണയും യഥാർഥ ഐസ്ക്രീമിന്റെ രുചി ഉറപ്പാക്കുകയാണ് ലക്ഷ്യം. എല്ലാ ഇന്ത്യൻ കുടുംബങ്ങൾക്കും താങ്ങാനാകുന്ന വിലയിൽ ഇത് ലഭ്യമാക്കും,” ആർ.സി.പി.എൽ. ഡയറക്ടർ ടി. കൃഷ്ണകുമാർ പറഞ്ഞു.
ദേശീയതലത്തിലുള്ള വിതരണ ശൃംഖല, വിപുലമായ റീട്ടെയിൽ സാന്നിധ്യം, ഉപഭോക്തൃ വിവരങ്ങൾ എന്നിവയുടെ പിന്തുണയോടെയാണ് ആർ.സി.പി.എൽ. ഐസ്ക്രീം മേഖലയിലേക്ക് കടക്കുന്നത്. വിഭാഗത്തിൽ ദീർഘകാല സാന്നിധ്യം ഉറപ്പാക്കുകയാണ് ലക്ഷ്യമെന്നും കമ്പനി വ്യക്തമാക്കി.
