തിരുവനന്തപുരം: സംസ്ഥാനത്തെ സർക്കാർ ആശുപത്രികളിലും കാരുണ്യ ഫാർമസികളിലും നേരിടുന്ന മരുന്ന് ക്ഷാമം സാധാരണക്കാരായ രോഗികളെ ദുരിതത്തിലാക്കുന്നതായി മുൻ ധനമന്ത്രി കെ.എൻ. ബാലഗോപാൽ. മരുന്ന് ലഭിക്കാത്തതിനെ തുടർന്ന് ചികിത്സ തുടരാൻ പോലും കഴിയാത്ത സാഹചര്യമുണ്ടാകുന്നതായും അദ്ദേഹം ചൂണ്ടിക്കാട്ടി.

“ഒരു രോഗി എന്നോട് പറഞ്ഞു, ദിവസം 450 രൂപയുടെ ഗുളിക വേണം. കാരുണ്യയിൽ മരുന്നില്ല. ജീവിക്കാൻ വയ്യാത്ത അവസ്ഥയാണ്” എന്നായിരുന്നു കെ.എൻ. ബാലഗോപാലിന്റെ പ്രതികരണം.

മരുന്ന് വിതരണത്തിലെ പ്രതിസന്ധി ഏറ്റവും കൂടുതൽ ബാധിക്കുന്നത് സ്ഥിരമായി മരുന്ന് കഴിക്കേണ്ട രോഗികളെയാണെന്ന് അദ്ദേഹം പറഞ്ഞു. സാമ്പത്തികമായി പിന്നാക്കം നിൽക്കുന്നവർക്ക് കാരുണ്യ ഫാർമസികളിൽ നിന്ന് കുറഞ്ഞ നിരക്കിൽ ലഭിക്കുന്ന മരുന്നുകൾ ആശ്വാസമായിരുന്നു. എന്നാൽ അവിടെയും മരുന്ന് ലഭ്യമാകാത്ത സാഹചര്യം ഉണ്ടാകുന്നത് രോഗികളുടെ ചികിത്സയെ ഗുരുതരമായി ബാധിക്കുന്നതായാണ് പരാതി.

മരുന്ന് വിതരണ കമ്പനികൾക്ക് നൽകാനുള്ള കുടിശ്ശികയും മരുന്ന് സംഭരണത്തിലുണ്ടാകുന്ന കാലതാമസവും ഉൾപ്പെടെയുള്ള കാരണങ്ങളാണ് ക്ഷാമത്തിന് പിന്നിലെന്നാണ് റിപ്പോർട്ടുകൾ. ചില അത്യാവശ്യ മരുന്നുകൾക്ക് സർക്കാർ ആശുപത്രികളിലും കാരുണ്യ ഫാർമസികളിലും ലഭ്യതക്കുറവ് നേരിടുന്നുണ്ട്.

പ്രതിസന്ധി പരിഹരിക്കുന്നതിനായി മരുന്ന് ക്ഷാമമുള്ള സാഹചര്യങ്ങളിൽ കാരുണ്യ ഫാർമസികൾ വഴി പ്രാദേശികമായി മരുന്ന് വാങ്ങി രോഗികൾക്ക് ലഭ്യമാക്കാൻ ആശുപത്രി മേധാവികൾക്ക് ആരോഗ്യ വകുപ്പ് നിർദേശം നൽകിയിട്ടുണ്ട്.

മരുന്ന് മുടങ്ങുന്ന സാഹചര്യം ഒഴിവാക്കി രോഗികൾക്ക് ആവശ്യമായ മരുന്നുകൾ സമയബന്ധിതമായി ഉറപ്പാക്കണമെന്ന ആവശ്യം ശക്തമാണ്.