പാലക്കാട്: സിപിഎം പാലക്കാട് ജില്ലാ സെക്രട്ടറി സ്ഥാനത്തുനിന്ന് ഇ.എൻ. സുരേഷ് ബാബുവിനെ മാറ്റി. മുൻ ആലത്തൂർ എംഎൽഎയും മുതിർന്ന നേതാവുമായ വി. ചെന്താമരാക്ഷനെ പുതിയ ജില്ലാ സെക്രട്ടറിയായി തിരഞ്ഞെടുത്തു. ഒക്ടോബർ നാലിന് സിപിഎം സംസ്ഥാന സെക്രട്ടറി എം.വി. ഗോവിന്ദന്റെ സാന്നിധ്യത്തിൽ ചേർന്ന വിശാല ജില്ലാ കമ്മിറ്റി യോഗത്തിലാണ് നിർണായക തീരുമാനം.
വ്യക്തിപരമായ കാരണങ്ങളാൽ സുരേഷ് ബാബു സ്ഥാനമൊഴിഞ്ഞെന്നാണ് പാർട്ടിയുടെ ഔദ്യോഗിക വിശദീകരണം. എന്നാൽ, അദ്ദേഹത്തിനെതിരെ ഉയർന്ന പരാതികളും സംഘടനാപരമായ വീഴ്ചകളും ഉൾപ്പെടെയുള്ള വിഷയങ്ങളാണ് മാറ്റത്തിന് പിന്നിലെന്നാണ് സൂചന.
സുരേഷ് ബാബുവിനെതിരെ ഗുരുതര സ്വഭാവമുള്ള പതിനൊന്നോളം പരാതികൾ സംസ്ഥാന നേതൃത്വത്തിന് ലഭിച്ചിരുന്നതായാണ് വിവരം. മഹിളാ അഭിഭാഷക സംഘടനയിലെ ഒരു വനിത നൽകിയ പരാതിയും ഇതിൽ ഉൾപ്പെടുന്നു.
പാലക്കാട് നിയമസഭാ മണ്ഡലത്തിലെ തിരഞ്ഞെടുപ്പ് തിരിച്ചടിയും പൊതുവേദികളിലെ പെരുമാറ്റവും പാർട്ടിക്കുള്ളിൽ വിമർശനങ്ങൾക്ക് കാരണമായിരുന്നു. പക്വതയില്ലാത്ത പെരുമാറ്റവും ധാർഷ്ട്യവും സംബന്ധിച്ച പരാതികളും നേതൃത്വത്തിന്റെ ശ്രദ്ധയിൽപ്പെട്ടിരുന്നു.
കൊഴിഞ്ഞാമ്പാറ, മണ്ണാർക്കാട്, കോങ്ങാട് തുടങ്ങിയ മേഖലകളിലെ സംഘടനാ വിഭാഗീയത പരിഹരിക്കുന്നതിൽ ജില്ലാ സെക്രട്ടറി പരാജയപ്പെട്ടെന്ന വിലയിരുത്തലും നടപടിക്ക് കാരണമായതായി സൂചനയുണ്ട്. കെ.ടി.ഡി.സി ചെയർമാൻ സ്ഥാനത്ത് പി.കെ. ശശിയെ സംരക്ഷിച്ചതുമായി ബന്ധപ്പെട്ട വിവാദങ്ങളും പാർട്ടിക്കുള്ളിലെ ആഭ്യന്തര വാക്പോരും പ്രതിസന്ധി രൂക്ഷമാക്കിയിരുന്നു.
ജില്ലാ സെക്രട്ടറി മാറ്റത്തിന് പുറമെ സംഘടനാ സംവിധാനം ശക്തിപ്പെടുത്തുന്നതിന്റെ ഭാഗമായി ജില്ലാ കമ്മിറ്റിയിലും പുനഃസംഘടന നടത്തി. എട്ടുപേരെ പുതുതായി ജില്ലാ കമ്മിറ്റിയിൽ ഉൾപ്പെടുത്തി. ആറ് ഏരിയ സെക്രട്ടറിമാരെ പ്രത്യേക ക്ഷണിതാക്കളായും നിശ്ചയിച്ചു.
പാലക്കാട്ടെ അടിയന്തര നേതൃത്വമാറ്റം സിപിഎമ്മിന്റെ സംഘടനാ തലത്തിലുള്ള തിരുത്തൽ നടപടികളുടെ ഭാഗമായാണ് വിലയിരുത്തപ്പെടുന്നത്. വരും ദിവസങ്ങളിൽ വടക്കൻ ജില്ലകളിലെ പാർട്ടി യോഗങ്ങളിലും സമാനമായ നടപടികൾ ഉണ്ടായേക്കുമെന്ന സൂചനയും ഇതോടെ ശക്തമായിട്ടുണ്ട്.
