അഞ്ച് ദിവസങ്ങളിൽ ഇന്ത്യയിലെ വിവിധ സംഗീതധാരകളുടെ സംഗമം; ദിവസവും സംഗീതാധിഷ്ഠിത സിനിമാ പ്രദർശനം
കൊല്ലം: സംസ്ഥാന സർക്കാരിന്റെ നൂറുദിന കർമ്മപരിപാടിയുടെ ഭാഗമായി സാംസ്‌കാരിക വകുപ്പിന്റെ നേതൃത്വത്തിൽ സംഘടിപ്പിക്കുന്ന അഷ്ടമുടി വാട്ടർ ഗേറ്റ് മ്യൂസിക് ഫെസ്റ്റിവലിന് ഇന്ന് തുടക്കമാകും. ഒക്ടോബർ 7 മുതൽ 11 വരെ കൊല്ലം ശ്രീനാരായണഗുരു സാംസ്‌കാരിക സമുച്ചയത്തിലാണ് സംഗീതോത്സവം നടക്കുന്നത്. എല്ലാ ദിവസവും വൈകിട്ട് ഏഴിനാണ് സംഗീതപരിപാടികൾ.
ഇന്ന് നടക്കുന്ന ഉദ്ഘാടനച്ചടങ്ങിൽ ടൂറിസം, സാംസ്‌കാരിക, സിനിമ വകുപ്പ് മന്ത്രി പി.സി. വിഷ്ണുനാഥ് ഫെസ്റ്റിവൽ ഉദ്ഘാടനം ചെയ്യും. തൊഴിൽ, വനിതാ, ശിശുക്ഷേമ വകുപ്പ് മന്ത്രി ബിന്ദു കൃഷ്ണ അധ്യക്ഷത വഹിക്കും. വനം, വന്യജീവി വകുപ്പ് മന്ത്രി ഷിബു ബേബി ജോൺ മുഖ്യാതിഥിയാകും. എൻ.കെ. പ്രേമചന്ദ്രൻ എം.പി., മേയർ എ.കെ. ഹഫീസ്, ജില്ലാ പഞ്ചായത്ത് പ്രസിഡന്റ് ആർ. ലതാദേവി, ജില്ലാ കലക്ടർ ആനി ജൂലാ തോമസ്, കൗൺസിലർ കുരുവിള ജോസഫ് എന്നിവർ പങ്കെടുക്കും.
ഉദ്ഘാടനച്ചടങ്ങിന് ശേഷം രാജസ്ഥാനിലെ മാംഗനിയാർ സംഗീതപാരമ്പര്യത്തിന്റെ സമ്പന്നമായ ശബ്ദലോകം അവതരിപ്പിക്കുന്ന മാംഗനിയാർ സെഡക്ഷൻ സംഗീതപരിപാടി അരങ്ങേറും.
വിവിധ സംഗീതധാരകളുടെ സംഗമം
അഷ്ടമുടിക്കായലിന്റെ പ്രകൃതിഭംഗിയും കൊല്ലത്തിന്റെ സാംസ്‌കാരിക പൈതൃകവും ഇന്ത്യയിലെ വിവിധ സംഗീതപാരമ്പര്യങ്ങളുമായി കൂട്ടിയിണക്കി വ്യത്യസ്തമായ സാംസ്‌കാരിക അനുഭവം ഒരുക്കുകയാണ് ഫെസ്റ്റിവലിന്റെ ലക്ഷ്യം. ‘മ്യൂസിക്കൽ ഇക്കോളജി – വാട്ടർ’ എന്ന ആശയത്തെ ആധാരമാക്കിയാണ് സംഗീതോത്സവം വിഭാവനം ചെയ്തിരിക്കുന്നത്.
ജലവും മനുഷ്യജീവിതവും സംസ്കാരവും സംഗീതവും തമ്മിലുള്ള ബന്ധം സംഗീതാവിഷ്‌കാരങ്ങളിലൂടെ അവതരിപ്പിക്കുന്നതാണ് ഫെസ്റ്റിവലിന്റെ പ്രത്യേകത. രാജസ്ഥാനിലെ മാംഗനിയാർ സംഗീതം, ഇന്ത്യൻ ഫ്യൂഷൻ, ജനകീയവും താളാധിഷ്ഠിതവുമായ സംഗീതധാരകൾ, സമകാലിക സംഗീതാവിഷ്‌കാരങ്ങൾ തുടങ്ങിയവയ്ക്ക് അഞ്ച് ദിവസങ്ങളിലായി വേദിയൊരുങ്ങും.
അഞ്ച് ദിവസങ്ങളിൽ അഞ്ച് സംഗീതപരിപാടികൾ
– ഒക്ടോബർ 7: മാംഗനിയാർ സെഡക്ഷൻ
– ഒക്ടോബർ 8: അരക വ്യൂഹം – ദി പെർക്കഷൻ ബാൻഡ്
– ഒക്ടോബർ 9: ഹംസിയും സംഘവും
– ഒക്ടോബർ 10: ശങ്ക ട്രൈബ്
– ഒക്ടോബർ 11: ഇന്ത്യൻ ഓഷ്യൻ
എല്ലാ പരിപാടികളും രാത്രി ഏഴിനാണ്.
ദിവസവും സംഗീതാധിഷ്ഠിത സിനിമകൾ
ഫെസ്റ്റിവലിന്റെ ഭാഗമായി എല്ലാ ദിവസവും ഉച്ചയ്ക്ക് രണ്ട് മുതൽ വൈകിട്ട് നാല് വരെ സംഗീതവുമായി ബന്ധപ്പെട്ട സിനിമകളുടെ പ്രദർശനവും നടക്കും. സംസ്ഥാന ചലച്ചിത്ര അക്കാദമിയുടെ നേതൃത്വത്തിലാണ് പ്രദർശനം.
സംഗീതജ്ഞരുടെ ജീവിതം, സംഗീതപാരമ്പര്യങ്ങൾ, സംഗീതവും സമൂഹവും തമ്മിലുള്ള ബന്ധം തുടങ്ങിയ വിഷയങ്ങളെ ആസ്പദമാക്കിയ സിനിമകളാണ് പ്രദർശിപ്പിക്കുക. സംഗീതവും സിനിമയും സമന്വയിപ്പിച്ചുള്ള സാംസ്‌കാരിക അനുഭവമാണ് ഇതിലൂടെ ലക്ഷ്യമിടുന്നത്.
സാംസ്‌കാരിക സമുച്ചയത്തിന് പുതിയ സജീവത
ശ്രീനാരായണഗുരു സാംസ്‌കാരിക സമുച്ചയത്തെ കൂടുതൽ സജീവമായ പൊതുസാംസ്‌കാരിക ഇടമാക്കി മാറ്റുകയും കൊല്ലത്തിന്റെ പ്രധാന സാംസ്‌കാരിക കേന്ദ്രമെന്ന നിലയിൽ അതിന്റെ പ്രവർത്തനങ്ങൾ ശക്തിപ്പെടുത്തുകയും ചെയ്യുന്നതിന്റെ ഭാഗമായാണ് ഫെസ്റ്റിവൽ സംഘടിപ്പിക്കുന്നത്.
കലാ-സാംസ്‌കാരിക പരിപാടികൾക്ക് കൂടുതൽ അവസരമൊരുക്കുന്നതിനൊപ്പം വിവിധ വിഭാഗങ്ങളിലുള്ളവർക്ക് എത്തിച്ചേരാനും കലയും സംസ്കാരവും അനുഭവിക്കാനും കഴിയുന്ന പൊതുഇടമായി സമുച്ചയത്തെ വികസിപ്പിക്കുകയാണ് ലക്ഷ്യം.
സംഗീതപരിപാടികൾക്കൊപ്പം സിനിമാ പ്രദർശനവും വിവിധ സാംസ്‌കാരിക പ്രവർത്തനങ്ങളും സംഘടിപ്പിക്കുന്നതിലൂടെ സമുച്ചയത്തെ കൂടുതൽ സജീവമാക്കുന്നതിനുള്ള തുടർപ്രവർത്തനങ്ങൾക്ക് ഫെസ്റ്റിവൽ വഴിയൊരുക്കുമെന്ന് മന്ത്രി പി.സി. വിഷ്ണുനാഥ് പറഞ്ഞു.
അഷ്ടമുടിക്കായലിന്റെ പ്രകൃതിപശ്ചാത്തലവും കൊല്ലത്തിന്റെ സാംസ്‌കാരിക പൈതൃകവും ഇന്ത്യയുടെ വൈവിധ്യമാർന്ന സംഗീതധാരകളും ഒരുമിക്കുന്ന സംഗീതോത്സവം കൊല്ലത്തിന്റെ സാംസ്‌കാരിക രംഗത്തിന് പുതിയ ഉണർവ് നൽകുമെന്നാണ് സംഘാടകരുടെ പ്രതീക്ഷ.
