ഗിരീഷ് എ.ഡി. സംവിധാനം ചെയ്ത ‘ബെത്ലഹേം കുടുംബ യൂണിറ്റ്’ ബുക്ക്മൈഷോ ടിക്കറ്റ് വിൽപ്പനയിൽ പുതിയ റെക്കോർഡ് സൃഷ്ടിച്ചു. നിവിൻ പോളിയും മമിത ബൈജുവും കേന്ദ്രകഥാപാത്രങ്ങളായെത്തുന്ന ചിത്രം 55.3 ലക്ഷം ടിക്കറ്റുകളാണ് ബുക്ക്മൈഷോ വഴി വിറ്റഴിച്ചത്.

2026 ഓഗസ്റ്റ് 21ന് ഓണക്കാലത്ത് റിലീസ് ചെയ്ത ഈ പ്രണയ-കുടുംബ ചിത്രം, ‘ലോകാ’ ഉൾപ്പെടെയുള്ള മുൻ മലയാള ഹിറ്റുകളെ പിന്നിലാക്കിയാണ് ബുക്ക്മൈഷോ ടിക്കറ്റ് വിൽപ്പനയിൽ കുതിച്ചുകയറിയത്. നിവിൻ പോളിയുടെ കരിയറിലെ ഏറ്റവും വലിയ വിജയമായി ചിത്രം മാറിയിരിക്കുകയാണ്.

238 കോടി രൂപയിലധികം ലോകമെമ്പാടും കളക്ഷൻ നേടിയ ചിത്രം, ഫഹദ് ഫാസിൽ, ദിലീഷ് പോത്തൻ, ശ്യാം പുഷ്കരൻ എന്നിവർ ചേർന്നുള്ള ഭാവന സ്റ്റുഡിയോസാണ് നിർമിച്ചത്. കിരൺ ജോസിക്കൊപ്പം ഗിരീഷ് എ.ഡി. തന്നെയാണ് തിരക്കഥയും ഒരുക്കിയത്.

ചിത്രത്തിന്റെ പുതിയ ‘എൻകോർ’ ട്രെയിലർ ഇന്ന് പുറത്തിറങ്ങിയതോടെ, പ്രേക്ഷകരുടെ ആവേശം വീണ്ടും ഉയരുകയാണ്. വിശാലമായ പ്രേക്ഷക സ്വീകാര്യതയും, വീണ്ടും കാണാൻ എത്തുന്ന കാഴ്ചക്കാരുടെ എണ്ണവും ചിത്രത്തെ തിയേറ്ററുകളിൽ തുടർന്നും ജനപ്രിയമാക്കുന്നു.