കൊച്ചി: കാക്കനാട്ട് സ്വകാര്യ ബസ് ഇടിച്ച് ഐടി ജീവനക്കാരി അക്ഷര (29) മരിച്ച സംഭവത്തിൽ ബസ് ഡ്രൈവറുടെ ലൈസൻസ് ആജീവനാന്തം റദ്ദാക്കണമെന്ന് ആവശ്യപ്പെട്ട് പോലീസ് മോട്ടോർ വാഹന വകുപ്പിന് ശുപാർശ നൽകി. അപകടത്തിന് കാരണം ഡ്രൈവറുടെ ഗുരുതരമായ അശ്രദ്ധയും അമിതവേഗവുമാണെന്ന് ചൂണ്ടിക്കാട്ടിയാണ് ഇൻഫോപാർക്ക് പോലീസ് നടപടി ആവശ്യപ്പെട്ടത്.

2026 നവംബർ നാലിന് രാവിലെ കാക്കനാട് കുഴിക്കാട്ടുമൂല ജങ്ഷന് സമീപമായിരുന്നു അപകടം. ജിമ്മിൽ വ്യായാമം കഴിഞ്ഞ് മടങ്ങുകയായിരുന്ന തൃശ്ശൂർ സ്വദേശിനിയായ അക്ഷരയെ ‘മലയിൽ’ എന്ന സ്വകാര്യ ബസ് ഇടിച്ചുവീഴ്ത്തുകയായിരുന്നു. ഗുരുതരമായി പരിക്കേറ്റ യുവതി ആശുപത്രിയിൽ ചികിത്സയിലിരിക്കെയാണ് മരിച്ചത്.

അപകടവുമായി ബന്ധപ്പെട്ട് ബസ് ഡ്രൈവർ സി.കെ. ബിനോയിക്കെതിരെ ഭാരതീയ ന്യായ സംഹിതയിലെ 105-ാം വകുപ്പ് പ്രകാരം മനഃപൂർവമല്ലാത്ത നരഹത്യയ്ക്ക് ഇൻഫോപാർക്ക് പോലീസ് കേസെടുത്തിരുന്നു. ഇയാളെ അറസ്റ്റ് ചെയ്യുകയും ചെയ്തു. അപകടസമയത്ത് ഡ്രൈവർ ലഹരി ഉപയോഗിച്ചിരുന്നോയെന്ന് കണ്ടെത്തുന്നതിനായി രക്തത്തിന്റെയും മുടിയുടെയും സാമ്പിളുകൾ ശേഖരിച്ചിട്ടുണ്ട്.

ഡ്രൈവർ ബിനോയിയുടെ ക്രിമിനൽ പശ്ചാത്തലവും അന്വേഷണത്തിൽ പുറത്തുവന്നിട്ടുണ്ട്. രണ്ട് ലഹരിമരുന്ന് കേസുകളും അടിപിടിക്കേസുകളും ഉൾപ്പെടെ ഏഴിലധികം ക്രിമിനൽ കേസുകളിൽ ഇയാൾ പ്രതിയാണെന്നാണ് പോലീസിന്റെ കണ്ടെത്തൽ. പോലീസ് ക്ലിയറൻസ് സർട്ടിഫിക്കറ്റ് ഇല്ലാതെയാണ് ഇയാളെ ബസിൽ ഡ്രൈവറായി നിയമിച്ചതെന്നും വ്യക്തമായിട്ടുണ്ട്.

അപകടമുണ്ടാക്കിയ ‘മലയിൽ’ സ്വകാര്യ ബസിന്റെ പെർമിറ്റ് മോട്ടോർ വാഹന വകുപ്പ് പത്തുദിവസത്തേക്ക് സസ്പെൻഡ് ചെയ്തിട്ടുണ്ട്. ബസിനെതിരെ നേരത്തെയും നൂറ്റമ്പതിലധികം നിയമലംഘന കേസുകൾ നിലവിലുണ്ടായിരുന്നതായാണ് വിവരം.

അതേസമയം, കാക്കനാട്ടെ അപകടത്തിന് പിന്നാലെ റോഡുകളുടെ ശോചനീയാവസ്ഥയും ബന്ധപ്പെട്ട വകുപ്പുകളുടെ വീഴ്ചകളും ചൂണ്ടിക്കാട്ടി മനുഷ്യാവകാശ കമ്മീഷനിലും പരാതി നൽകിയിട്ടുണ്ട്. മോട്ടോർ വാഹന വകുപ്പിന്റെയും പൊതുമരാമത്ത് വകുപ്പിന്റെയും അനാസ്ഥയും പരാതിയിൽ ഉന്നയിച്ചിട്ടുണ്ട്.

ഡ്രൈവറുടെ ലൈസൻസ് ആജീവനാന്തം റദ്ദാക്കണമെന്ന പോലീസിന്റെ ശുപാർശയിൽ മോട്ടോർ വാഹന വകുപ്പിന്റെ തുടർനടപടികൾ ശ്രദ്ധേയമാണ്.