മലപ്പുറം: പ്രശസ്ത യൂട്യൂബറും സോഷ്യൽ മീഡിയ ഇൻഫ്ലുവൻസറുമായ സ്വാലിഹ് വളാഞ്ചേരി (37) അന്തരിച്ചു. ന്യുമോണിയ ബാധയെ തുടർന്ന് പെരിന്തൽമണ്ണയിലെ സ്വകാര്യ ആശുപത്രിയിൽ ചികിത്സയിലിരിക്കെയാണ് മരണം.

ശാരീരിക വെല്ലുവിളികളെയും ഭിന്നശേഷിയെയും ആത്മവിശ്വാസത്തോടെ മറികടന്ന് സമൂഹമാധ്യമങ്ങളിൽ സജീവമായിരുന്ന സ്വാലിഹ്, തന്റെ യൂട്യൂബ് വീഡിയോകളിലൂടെ നിരവധി ആരാധകരെ സ്വന്തമാക്കിയിരുന്നു. ജീവിതത്തിലെ പ്രതിസന്ധികളെ ആത്മവിശ്വാസത്തോടെ നേരിട്ട അദ്ദേഹത്തിന്റെ വീഡിയോകൾക്ക് വലിയ സ്വീകാര്യതയാണ് ലഭിച്ചിരുന്നത്.

ന്യുമോണിയ ബാധയെ തുടർന്ന് ചികിത്സയിലായിരുന്നെങ്കിലും ആരോഗ്യനില വഷളായതിനെ തുടർന്നാണ് മരണം സംഭവിച്ചത്.

മൃതശരീരം കരേക്കാട് സി.കെ. പാറ ജുമാമസ്ജിദ് ഖബർസ്ഥാനിൽ ഖബറടക്കി. കുടുംബാംഗങ്ങൾക്കും സുഹൃത്തുക്കൾക്കും ആരാധകർക്കും സ്വാലിഹിന്റെ വിയോഗം വലിയ നഷ്ടമായി.