ന്യൂഡൽഹി: ആഗോള ഊർജ പ്രതിസന്ധിക്കിടയിൽ രാജ്യത്തിന്റെ ഊർജ സുരക്ഷ ശക്തിപ്പെടുത്തുന്നതിനായി ഇന്ത്യ ക്രൂഡ് ഓയിൽ ഇറക്കുമതി നടത്തുന്ന രാജ്യങ്ങളുടെ എണ്ണം 27ൽ നിന്ന് 41 ആയി വർധിപ്പിച്ചതായി കേന്ദ്ര പെട്രോളിയം-പ്രകൃതിവാതക മന്ത്രി ഹർദീപ് സിംഗ് പുരി അറിയിച്ചു. ദക്ഷിണ ഗുജറാത്തിൽ നടന്ന ‘വൈബ്രന്റ് ഗുജറാത്ത് റീജിയണൽ കോൺഫറൻസ്’യിൽ സംസാരിക്കുകയായിരുന്നു അദ്ദേഹം.
ദീർഘകാല ആസൂത്രണമാണ് ആഗോള ഊർജ പ്രതിസന്ധിയെ ഫലപ്രദമായി നേരിടാൻ ഇന്ത്യയെ സഹായിച്ചതെന്ന് മന്ത്രി പറഞ്ഞു. അന്താരാഷ്ട്ര വിപണിയിലെ അനിശ്ചിതത്വങ്ങൾക്കിടയിലും രാജ്യത്തിന് ആവശ്യമായ ക്രൂഡ് ഓയിൽ ലഭ്യത ഉറപ്പാക്കാൻ വിവിധ രാജ്യങ്ങളുമായുള്ള ബന്ധം വികസിപ്പിച്ചതായും അദ്ദേഹം വ്യക്തമാക്കി.
രാജ്യത്തെ ആഭ്യന്തര ഉൽപാദനം വർധിപ്പിക്കുന്നതിനായി റിഫൈനറികളിൽ എൽപിജി ഉൽപാദനം പരമാവധി ഉയർത്താൻ നിർദേശം നൽകിയതായും പുരി പറഞ്ഞു. ഇതിന്റെ ഭാഗമായി ആഭ്യന്തര എൽപിജി ഉൽപാദനം 60 ശതമാനം വർധിപ്പിക്കാൻ കഴിഞ്ഞുവെന്നും അദ്ദേഹം അവകാശപ്പെട്ടു. പ്രതിദിന ഉൽപാദനം 36,000 മെട്രിക് ടണ്ണിൽ നിന്ന് 54,000 മെട്രിക് ടണ്ണായി ഉയർന്നതായും അദ്ദേഹം കൂട്ടിച്ചേർത്തു.
ആഗോള വിപണിയിൽ ഇന്ധനവില ഉയർന്ന സാഹചര്യത്തിലും ഉപഭോക്താക്കൾക്ക് അതിന്റെ ആഘാതം കുറയ്ക്കാൻ സർക്കാർ വിവിധ നടപടികൾ സ്വീകരിച്ചതായും മന്ത്രി പറഞ്ഞു. രാജ്യത്തിന്റെ ഊർജ ആവശ്യങ്ങൾ ദീർഘകാല അടിസ്ഥാനത്തിൽ ഉറപ്പാക്കാനുള്ള നടപടികൾ തുടരുമെന്നും അദ്ദേഹം വ്യക്തമാക്കി.
